Shillong, Lber, 13: Saw ngut ki rangiakura MMA ba kynthup ia u Johny Nongrum, u Moderkai S. Kharpuri, u David Ronghang, u Feathrel Massar bad ka Evadahun Shisha Rani ki la ioh khur ia ka jingjop ha ka rynsan iakura MMA kaba la tip kum ka Lastman Standing Fight Night-3 kaba la long ha ka 10 tarik, Lber, 2024 ia kaba la pynlong da ka Sunayana Entertainment ha nongbah Kolkalta, jong ka Jylla West Bengal
Ka samla Evadahun Shisha Rani kaba mihkmat ia ka Legendary Warrior Combat Team ka la iohrah ia ka jingjop ha ka jingiakhun ha ka kyrdan Straw Weight Category, kynthup ruh u Feathrel Massar uba iakhun ha ka Feather Weight Category bad mihkhmat na ka Legendary Warrior Combat Team.
Nalor kine, u Moderkai S. Kharpuri ruh u la ioh khur ia ka jingjop ha ka jingiakhun ha ka Middle Weight, Co-Main Event bad uba la mihkhmat na ka Lumshyiap Sports and Cultural Club.
Kaba kham pynnoh mynsiem khyndiat ia kane ka kynhun ki nongiakura ka jylla ka long hadien ba u Johny Nongrum uba iakhun ia ka Main Event u la shah pynliem noh ha u nongiakhun pyrshah uba na ka ri Australia, u Shoshi Friendrich.Hynrei shwa kane, u Johny Nongrum u la shu jop ei da kaba suk ha ka Middle Weight hadien ba u nongiakhun pyrshah um shym la wan mih satia shalor rynsan.
