Shillong, Lber, 13: Ka Khasi Hills Autonomous District Council (KHADC) ka la rai ban kyntu ia ka sorkar jylla ban weng noh ia ka jingpynbna jong u snem 2015, kaba la bthah ba ym donkam ban ioh ia ki laisen khaii napoh ki District Council.
Haba jubab ia ka phang hapoh ka Dorbar Mang tyngka ha ka sngi Balang, u CEM ka KHADC u Bah Pynïaid Sing Syiem u la ong ba ka jingpynbna kaba la pynmih ha ka por jong ka sorkar u Dr Mukul Sangma ka la shah ia ki kompeni kiba heh ba kin sdang ban trei ia ki kam ha shwa ba kin ioh ia ki laisen khaii napoh ki ADC ha ka jylla.
“Ngi dang iai buddien ia kane ka kam bad ka sorkar jylla. Ngin sa kyrpad ia ka sorkar ba kan pyndam noh mardor ia kane ka jingpynbna,” u la ong.
Na ka liang u CEM u la ong ba ka executive committee jong u ka la trei shitom ban nang pynkhlain ia ka ain Trading By Non-Tribal Regulations Act, 1954 ban iada ia ka ioh ka kot jong ki trai ri trai muluk.
Ia kane ka phang la wanrah da u nongialam ka liang iatei u Bah Titosstarwell Chyne ban iatai halor ka im ka iap bad ka ioh kamai jakpoh jong ki briew kiba hab hapoh u pud u sam jong ka council.
Halor ki kam ba iadei bad ki tourist taxi, u Bah Syiem u la ong ba ka council ka la dep khot ia ka jingialang bad ki tourist taxi jong ka Meghalaya ha u snem ba la dep ha kaba ia ka shithi la dep phah shapoh ka ophis u District Transport Officer (DTO) East Khasi Hills bad sha kiwei pat ki district ba kim dei ban ai ia ki permit sha ki bar jylla, kiba khlem pat ioh ia ki laisen khaii napoh ka council.
Haba iadei bad ki kam jngohkai, na ka liang u CEM u la ong ba shen ka council bad ka sorkar jylla kan pynlong ia ka certification programme halor ki tour guide ban pynshlur ia ki briew na jylla ne na ki shnong ban sdang ia kane ka kam kaba aikam aijam na ka bynta ka jakpoh jong ki.
U la ong ba ka Council ka la shim ruh ia ki lad ki lynti ba la iakynduh jingeh da ki nongrep bad bynrap ba ka Council ka ladep shna ruh ia ki iew die lang ha Mawryngkneng, Mawsynram bad ha Pynursla.
