Shillong, Nailur, 14: U Bah Jeslanroy Nongsiej uba long uwei napdeng ki nongïalam jong ka United Democratic Party Mawkyrwat Circle, u la shah jied ban long kum u kyrtong MDC hadien ba u la jop ïa ka ilekshon jied kyrtong na ka bynta ban ïakhun ïa ka ilekshon MDC napoh Mawkyrwat Constituency, kaba la pynlong da ka Election Committee jong ka United Democratic Party, Mawkyrwat Circle ha ophis jong ka party ha Mawkyrwat ha ka sngi Saitjaiñ.
Ïa kane ka ilekshon jied kyrtong la pynïaid nadong shadong da ka Election Committee jong UDP Mawkyrwat Circle hapoh ka jingïalam jong u Chairman u Bah F.D. Ramsiej. Ka jingïathep vote ka long kaba ïaid beit ïaid ryntih ha ryngkat ka jingkhuid jingsuba ha kaba kam shym la don satia kano kano ka jingthut ne jingkhohnïoh na kano kano ka liang bad baroh ki la mynjur bad ïahun lang ïa ka rukom pynïaid.
Katkum ka jingpyntip jong u Bah Ramsiej, ki don haduh saw ngut ki rangbah nongïalam jong ka UDP Mawkyrwat Circle kiba la pan tiket na ka UDP ban ïakhun ïa ka ilekshon MDC na Mawkyrwat Constituency, kata, u Bah Adilbert Ïawphniaw, u Bah Synshar Lyngdoh, Jeslanroy Nongsiej, bad u Bah Poland Sohphoh.
Ha kane ka ilekshon ba la ailad tang ïa ki President bad ïa ki Secretary jong ki Polling Unit, ki dkhot ka Executive Committee jong ka UDP Youth Wing, ki dkhot jong ka Executive Committee jong ka UDP Women Wing bad ïa ki dkhot jong ka Executive Committee ka UDP Mawkyrwat Circle, u Bah Jeslanroy Nongsiej u la wan ha ka kyrdan banyngkong, u bah Adelbert Ïawphniaw u la wan ha ka kyrdan ba-ar, u Bah Poland Sohphoh u la wan balai bad u bah Synshar Lyngkhoi u la wan basaw.
Ïa ka kyrteng jong u Bah Jeslanroy Nongsiej yn sa phah sha ki bor bahalor jong ka UDP Central Body ban ai jingmynjur.
