Shillong, Risaw, 04: U Chancellor jong ka University of Science and Technology, Meghalaya (USTM) u Mahbubul Hoque ha ka sngi Thohdieng u la ong ba ym don mano mano ruh ba lah ban khanglad ïa ki samla kiba la pas na ka University ban ïohkam ha kano kano ka bynta jong ka ri.
U Hoque ula jubab ïa ka jingkylli halor ka jingkren dang shen da u Myntri Rangbah ka Jylla Assam u Himanta Biswa Sarma ba ki samla kiba pas na ka USTM kin ym ïoh ïa ki kam sorkar hapoh ka Jylla Assam.
“Ka pule puthi ka dei ka mat jong ka Sorkar Jylla bad Sorkar Pdeng. Kino kino ki samla kiba pas na kano kano ka University ha kano kano ka bynta jong ka ri ne wat nabar ri, ym don satia mano mano ba lah ban khanglad. Mynta ki por, ïa ki kam ki jam la pynshong nongrim da ki jingpynlong eksamin bad mynta lada ki samla pule jong ngi ki lah ban pas ïa ka NET Examination, ki long kiba bit ban rungkam ha kino kino ki University ne ha kino kino ki College,” la ong u Hoque ha ka jingïakren bad ki lad pathai khubor.
“Ha kajuh ka rukom na ka bynta ki kam kiba rit kum ka kam hikai skul, mynta ka CTET, ka State TET ka don, lada mano mano ki pas, ym don satia ba lah ban khang. Ka la mih ka jingkhuslai jingmut hapdeng ki samla pule hynrei ngi la pynsngnewthuh ïa ki,” ula bynrap.
Da kaba pynpaw ba ka USTM ka dei kaba la ïoh ‘A’ Grade na ka NAAC, u Hoque u la ong, “…ngi dei napdeng ki 200 tylli ki University ba kynsai tam ha ka ri bad baroh ki Certificate bad ki Aplikeshon la ai da ka Sorkar India,”
“Ngim ju ai jubab ïa kum kine ki jingkren (ba la kren da u Myntri Rangbah ka Assam), hynrei kane ka la pynkhuslai jingmut ïa ki samla pule, ngi leh hok, ngi trei hok, ki paidbah na kylleng ka ri ki tip lut shaphang ka USTM,” u la ong shuh shuh.
“Ngi la pynsngewthuh ïa ki samla pule ba ha ka jingleh bha ïa ki jingpule ym don nongshuh, ïaid shakhmat, minot ban pas bha ha ki eksamin, ym don mano mano ruh ba lah ban khanglad ïa phi,” u la bynrap.
