Shillong, ïaïong, 03: Kawei ka kali Gypsy jong ki Pulit kaba pynieng ha Mawlai Police Station, Shillong ka la julor hadien ba ki runar ki bym lah ban ithuh durkhmat ki la kawang da u petrol bom ia kane ka kali ha ka step phyrngap sngi Balang.
U Superintendent of Police ka East Khasi Hills, Rituraj Ravi ha u kyrwoh ba la phah sha ki lad pathai khubor u la pyntip ba kane ka la jia ha ka por kumba 2:40 baje mynstep ha kaba san ngut ki runar bym lah ban ithuh ki la rung shapoh ka jaka pynieng kali ha Mawlai Police Station bad kawang da u petrol bom ia ka kali Gypsy kaba don ia u nombar ML02-0194 kat haduh ba ka kali ka la kem ding bad julor.
Ha kaba iadei bad kane ka jingjia, ki Pulit ki la register case ha Mawlai Police Station hapoh ka Section 120B/307/427/436/34 Indian Penal Code bad pule lang bad ka Section 3 jong ka Explosive Substances Act, 1908 bad ka Section 4 jong ka Prevention of Damage to Public Property Act, 1984.
U SP u la pyntip ba ka jingtohkit halor kane ka jingjia ka dang iaid shakhmat.
