Shillong, ïaïong, 03: Ki shipai BSF jong ka 181 Battalion kiba la pynlong ia ka jingkhynra ryngkat ka jingiatreilang bad ki Pulit ka Meghalaya, ha ka sngi Baar ki la ioh bat lai tyli ki kali kiba kit ia ka shini ba la thmu ban khaii beain sha ka ri Bangladesh.
Halor kane ka jingjia, lai ngut ki nong India ki la shah kem najan khappud ka shnong Gasuapara kaba hap hapoh ka South Garo Hills District.
Lyngba ka jingioh jingtip kaba bniah na ki tnat syntiat, ki shipai BSF bad ki Pulit ki la pynlong ia ka jingtalsi kali hajan Gasuapara bad iohbat ia kine ki lai tyli ki kali kiba kit palat 70,000 kilo ka shini.
Ha ka jingtohkit, ki lai ngut ki nongniah kali kim shym la lah ban pyni ia ki dulir kiba biang ban kit ia kane ka shini.
Ia ka shini ba la ioh kurup la aiti noh sha ki Pulit jong ka Gasuapara ban leh ia kaba donkam.
Tang hapoh lai bnai jong une u snem, ki shipai BSF ki la ioh kurup kumba 1188 ton ka shini ia kaba la thmu ban khaii beain sha ka ri Bangladesh lyngba ka khappud jong ka jylla Meghalaya.
