Shillong, K’lyngkot, 04: Ka Khun Hynniewtrep National Awakening Movement (KHNAM) ha ka sngi Saitjaiñ ka la takraiñ tyngeh ïa ka Sorkar Jylla ba la ïalam da ka National Peoples Party (NPP) kaba pynjlan ïa ka samoi treikam jong ki ar tylli ki Autonomous District Council (ADC) ha rilum Khasi bad Jaiñtia sa shi snem wat hadien ba ka samoi treikam kaba san snem pura ki la kut noh.
Ha ka jingïakren bad ki lad pathai khubor u President jong ka KHNAM u Bah Thomas Passah u la ong, “ïa ka elekshon ladep pynbna da u Symbud Myntri Rangbah ka Jylla uba khmih ïa ka tnat District Council Affairs (DCA) u Bah Prestone Tynsong hynrei katkum ka rul ka ong, haba la pynbna ïa ka elekshon ka Model Code of Conduct (MCC) ka dei ban treikam bad kumno yn pynbna (ïa ka tarik elekshon) da u Myntri ubakhmih ïa ka tnat DCA? Hynrei ka dei ban wan da ka jingpynbna kaba pynmih na ka ophis treikam jong u Lat ka Jylla.”
“Ka jingtuklar bad ka jingmushlia jong ka Sorkar Jylla ha ki kam ki jam jong ka District Council bad ka jingpynjlan ïa ka samoi treikam ka dei ka jingleh donbor ka lah pynmong ïa kiba bun tylli ki shnong kiba kwah ban ïashim bynta ha ka elekshon MDC,” u la ong haba pynkynmaw ïa ka jingbitar jong ki shnong kiba la shah pynhap sha kiwei pat ki Constituency hadien ka jingpynbeit thymmai ïa ki Constituency kiba hap hapoh ki ar tylli ki Autonomous District Council ka rilum Khasi bad Jaiñtia.
“Ngi ïohi ha ka por baladep, ka jingpynjlan ïa ka samoi treikam kaba shi snem, hynrei wat hadien ka jingpynbeit thymmai ïa ki shnong, dang bun ki shnong ki bym hun bad ka long kaba sngewsih ban ïohi ba ki don ki shnong kiba byrngem ban ym ïashim bynta (boycott) ha ka elekshon. Ka don jingbakla ha ka jingpynbeit thymmai ïa ki shnong namar ka jingleh kyrkieh lane lah ban ong noh ba ka dei tang ka buit ban shu pynjlan. Hynrei lada phi peit ïa ki kyndon kiba don hapoh ka Sixth Schedule, ha ka Article 3 u Lat ka jylla u lah ban pynjlan ïa ka samoi treikam jong ki Autonomous District Council tang lada don ka National Emergency hynrei ngi sngewsih ban ong ba ka iktiar laitluid (autonomy power) jong ka District Council ka laduh. Ngi kren ïa kata namarba ka jingtuklar shaba palat jong ka Sorkar Jylla,” la kynthoh u Bah Passah.
