Ka shlem wad bniah ka “Institute of Bioresources and Sustainable Development (IBSD)” ka dei tang kawei ka shlem wad bniah hapoh ka thain shatei lam mihngi ka Ri India hapoh ka jingpynïaid jong ka Biotechnology Research and Innovation Council (BRIC), Department of Biotechnology, Govt. of India. La seng ïa ka BRIC-IBSD ha Imphal, Manipur bad ka don lai tylli ki tnad ophis treikam hapoh ka jingpeit jongka kaba dei ha North East Region (NER) kiba kynthup ïa ka Meghalaya, ka Mizoram bad ka Sikkim. Ka BRIC-IBSD ka trei kam halor ki spah mariang, kumno ban pyndonkam ïa ki, kumno ban pynkiew ïa ka ïoh ka kot ka NER, bad kumjuh ban pynneh pynsah ïa kine ki spah mariang lyngba ki kor jingstad saïan. Ka IBSD ka treikam ha kiba bun rukom ki jingwad bniah kumno ban pynmih ïa ki lad ki lynti kamai spah lyngba ki spah mariang khamtam ha ki thain mihngi.
Halor kane, ka Sorkar pdeng ka la mynjur bad pynmih ïa ka ‘BioE3 (Biotechnology for Economy, Environment and Employment) Polisi ban wanrah ïa ka rukom trei kam da kaba pyndonkam ïa ki kor jingstad ka juk mynta, ban sei ïa ki buit jingstad thymmai lyngba ki kor saïan, na ka bynta ban pynïoh kam ïoh jam bad ban pyndonkam, pynneh, pynsah ruh ïa ki spah mariang. Kane ka polisi kan pynkhlain ïa ka ïoh ka kot, kan pynduna ïa ka jingduh nong bad kan ïarap pynbha ïa ka mariang bad ka rukom im ki briew. Kane kan plie lad ban kyntiew ïa ka rukom wad bniah ba thymmai, ban pynmih ïa ki mar da kaba pyndonkam ki technology ba thymmai kum ki artificial intelligence (AI) bad ki Biomanufacturing Hubs/Biofoundry/Bio-AIs. Kane ka policy kan long ruh kum ka lad ïoh kam bad kan ïarap ban pyntbit shuh-shuh ïa ki nongtrei kam katkum ka juk jingstad mynta.
Ka BioE3 Polisi kan ïarap kyntiew ïa ka kam shna jingshna ha India (‘Make in India’ initiative) khamtam ha ki mar ba don jingim kiba mih na ka mariang, khlem da pynjulor jur ïa ka mariang bad kane kan pynlong ïa ka India ka ri ka bashai bad ba riewspah (Viksit Bharat). Kane ka polisi ka pynshlur ban pynmih ïa ki nong seng kam lajong lyngba ka jingïasnoh kti lang bad kiwei pat ki nong seng kam kiba don kajuh ka jingthmu. Bad kane kan ïarap ïa ki nong India ba kin ieng halor ki kjat jong ki.
Ka juk kaba mynta ka la dei ka juk ban bei pisa halor ki spah mariang da kaba pyndonkam ïa ki khlem da pynjulor ne pynduhjait syndon. Ka long ruh ka lad ban pynshai ïa ki paidbah halor ka jingïada na ka jingkylla ka mariang/suin bneng, ka jingïada na ka jingkyrduh bam bad ka jingïada na ki jingpang jingshitom. Ka IBSD ka trei kam ha ki thain ba kynrei bha ki spah mariang, kaba ki khot ka “Indo-Burma biodiversity Hotspot”, bad kaba long ruh kawei na ki hotspot ha pyrthei kaba riewspah bha ha ki jingbun ki khlaw ki btab, ki khniang, phngit jingim, ki mrad ki mreng, bad ki jingbam tynrai. Ka BioE3 Polisi kan ïarap ban pynbha, pynkiew bad pynneh ïa ki rukom pyndonkam ki spah mariang lyngba ka jingstad saïan bad technology ha ka liang ka shna dawai bad jingbam, kum ki enzymes, chemicals, functional foods, smart proteins bad biotherapeutics.
Ha ka pyrthei baroh kawei, ki jingdawa ïa ki dawai dashin kiba pynmih lyngba ki kynbat bad ki jait jingbam kiba ai jingmyntoi ïa ka koit ka khiah ki lang kiew arsut. Kine baroh ngi lah ban shna bad pynmih na ki spah mariang kum ki jingthung, ki kynbat, ki sohpailen (algae), ki tit (fungus), ki khniang (insects) kiba bun jait, bad na ki jingbam tynrai kiba shu pdem (fermented foods) kum ki tungrymbai, ki ktung, ki lungsiej ter-ter. Kane ka polisi kan ïarap ban pynmih ïa ki smart proteins, functional foods lyngba ki synthetic biology bad metabolic engineering tools. Kane ka polisi kan ïarap shibun ha kaban pynseng ïa ki Bio-AI hubs kiban long ki jaka lum bad jaka wad bniah halor kine ki products, bad lyngba kane, kan ïarap plie lad ban pynmih kam kham bun.
U Prof. Pulok Kumar Mukherjee, Director jong ka BRIC-IBSD, u la pynsngew ba ka IBSD ryngkat bad kiwei kiwei ki department ki ïa trei kam lang halor ki spah mariang ba kordor tam jong ki thain shatei lam mihngi. Ki kam ki long ki jingwad bniah halor ki jingthung, ki kynbat bad kiwei kiwei ki jait jingim, bad kumno ban pyndonkam/pynroi ïa ki da ki technology saïan ba thymmai khnang ban kan ïarap ban kyntiew pynïar ïa ka ïoh ka kot ha ki bynta bapher-bapher. U la bynshet ba ka BioE3 Polisi ka dei ka mawjam kaba bha tam kaba la pynmih da ka Sorkar pdeng ban kyntiew bad pynriewspah ïa ka jaitbynriew baroh kawei lyngba ki spah mariang.
