Shillong, K’Lyngkot, 08: Ka kynhun kiengatiar ba la shah kheiñ beaiñ Hynniewtrep National Liberation Council (HNLC), lyngba u nongmihkhmat Bah Sadon K. Blah uba long ruh u President jong HNYF, ka la pynpaw ba ka jingïakren ïasuk kan bteng tang lada ka Sorkar Jylla bad ka Sorkar Pdeng ki weng noh ïa baroh ki mukotduma ba la pynngat pyrshah ïa ki nongïalam bad ia ki dkhot jong ka seng.
“Lada ka Sorkar ka weng noh ïa ki mukotduma bad mab lut ïa ki jingleh jingkam jong ki dkhot ka seng, ka don ka lad ba ka jingïakren ïasuk kan ïai bteng namarba ïa kane la tyrwa hi da ka HNLC kumta ka don ka jingkyrmen ba ka jingïakren kan ïaid biang hynrei lym kumta, ka jingïakren ka la kut,” la ong u Bah Sadon Blah ha ka jingiakren bad ki lad pathai khubor.
U la pynpaw ba kum u nongmihkhmat jong ka HNLC, ka Sorkar ka ïaiban ban iaid da ka lynti jong ka ain katba ka HNLC pat ka kwah ban iaid da ka mon jong ka Sorkar. “Kumta kane ka shong mynta ha ka bor jong ka Sorkar,” la ong u Bah Blah.
“Mynta kane ka don ar lynti, lada ka Sorkar ka kwah ban pynbeit ïa kane ka jingeh da kaba ïaid da ka lynti jong ka aiñ lane da kaba shim rai hi da ka bor jong ka sorkar,” u la ong bad bynrap, “baroh ki thma ha ka pyrthei la lah ban tehlakam ym da ka lynti ka aiñ hynrei da ka bor jong ka Sorkar.”
“Lada ka Sorkar ka kam ba ka bor ka don ha ka HNLC, ka dei ka lynti jong ka aiñ ba ka sorkar ka kwah hynrei lada ka HNLC ka ong ba ka rai ka shong ha ka Sorkar, ka kynhun ka ïai ban ba ïa ka kam dei ban leh beit da ka Sorkar. Mynta ka Sorkar ka dei ban pyntreikam da ujuh u dieng thew ia ka HNLC thik kumba ka leh ïa ki sengbhalang ha ka jingïakhih ILP ha u snem 2013,” u la ong shuh shuh.
Haba pynkynmnaw ia ka jingïakhih ILP ha ki snem ba la leit noh, u Bah Sadon u la ong, “wat ma nga ruh nga la shah pynngat ha kiba bun ki kyndon hynrei da ka jingïakren la weng lut lait noh tang lai tylli. Kumta, lada ïa u dieng thew lah ban pyntreikam ïa ki sengbhalang kiba ïakhih, balei pat ym lah ban pyntreikam lang ïa ka HNLC, ka dei tang ka mon jong ka sorkar kam da donkam satia ban ïaid da ka lynti jong ka aiñ.”
Ha kaba iadei bad ka jingdawa jong ka HNLC ban mab noh ia ki mukotduma, u Bah Sadon u la ong, “wat u AK Mishra (MHA Advisor North East) u ladep pynpaw ba kim da don than ki kam kiba triem jong ka HNLC. Kumta, lada ki kam jong ka seng kim da dei kiba triem kumta ka Sorkar ka dei ban pyrkhat bad weng noh ïa ki mukotduma ïa baroh ki nongïalam bad ki dkhot jong ka kynhun.”
