Shillong, Nailar, 31: U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem u la phah da u kyrwoh uba shai sha ki thei Khasi ba ka jaiñkyrshah jong ki kam dei ban long ka jaiñkyrshah kaba ïada ïa ki poiei shi sngi.
Ïa kane, u Bah Pynïaid u la kren lyngba ki lad pathai khubor ha ka sngi palei ha ka jingleit ai khublei jong ka Hynñiewtrep Ïewduh Association (HIA) ïa ka Council kaba la shimkhia ban peitngor ïa ka jingjyllei jong ki bar jylla kiba die madan khlem ki kot ki sla kiba biang ha Ïewduh bad ha G.S Road. “Ha ka jingleit jong ngi mynshi sngi, ngi la lap ba ki don ki nongshong iew ki bym dei na ka jaidbynriew Khasi ki la die jingdie harud surok khlem ki kot ki sla kiba biang,” u la ong.
“Ka jingleit jong ngi ha kato ka sngi bad ynda la kylli ïa ki kot ki sla kim don. Nga shu kwah ban kren shai, baroh kiba khaïi khlem ki kot ki sla khamtam kito ki bym dei ki Khasi kim lah ban khaïi khlem ka Trading License ba la ai da ka District Council,” la ong u Bah Pynïaid.
“Kaba sngewsih, kaba ngi ïohi pat ïa ki thei Khasi jong ngi, ynda ladep ban khynra ki mih shakhmat ban kam ïa kine ki dukan. Kane kaba la pynkhia jingmut bha ïa ngi bad kaba nga kwah ban kren shai bad maham ïa ki thei Khasi jong ngi ba kim dei ban long kita ki thei Khasi ban phong ïa ka jaiñkyrshah namarba ka jaiñkyrshah Khasi ka dei ka jaiñkyrshah kaba da ïa ka burom ka akor bad ka long kawei kaba pyni ïa ka jingriewspah jong ka riti ka dustur ha ka riam ka beit. Ngam kwah ba kane ka jaiñkyrshah kaba da ïa ka burom ka akor jong ngi ki kynthei Khasi kan long ka jaiñkyrshah kaba da ïa ki khar poiei shi sngi. Kata ka dei ka khubor ka tyngeh na ka liang jong ka District Council,” la maham u Bah Pynïaid.
Haba kylli, u CEM u la ïathuh ba ki bar jylla ki bym don ïa ka laisen khaïi haduh mynta kim pat wan mih satia sha ka ophis jong ka Council.
“Ngi la phah ïa ki Pulit Enforcement bad nga la bthah ïa u Superintendent ba un ai ïa ka kaiphod haduh ba ki (nongkhaïi bar jylla) kiba wan shane bad ngin sa peit kaei kaba ngi dei ban leh. Haduh mynta, lada ki leh pyrshah ïa kata ngim banse ban shim da kawei pat ka lynti,” u la ong.
Ha kaba ïadei bad ka jingleit jurip ïa ka Ïewduh dang shen, u CEM u la ïathuh ba ka District Council ka la thaw ruh da ka Komiti kaba peit thik ïa ka jingshngaiñ hapoh Ïewduh bad ïa ki shnong bamarjan bad ïa ka jingkhuid jingsuba.
Ïa kane ka komiti la khlieh hi da u CEM bad ki dkhot ki kynthup ïa ka EM i/c Market ka Kong Grace Mary Kharpuri, u EM i/c Health and Sanitation ba peit ruh ïa ka Solid Waste Management u Bah Victor Ranee, u Addl. DC Bah Ronie Wahlang, na ka tnat Pulit la pynrung dkhot ïa u Sector Officer u Bipul Das, na ka tnat Pynroi Sor bad ki Rangbah Shnong jong ki hynriew tylli ki shnong ba ker sawdong ïa ka Ïewduh, u Syiem ka Hima Mylliem bad ki Myntri ba peit ïa ka iew.
Ka nongïalam jong ka Hynñiewtrep Nongiew Association ka Kong Victoria Marweiñ hadien ka jingïakynduh ïa u CEM jong ka KHADC ka la ong, “ha kato ka sngi, ba kin mih da ki kynthei Khasi ba kin kren da kato ka rukom ka dei ka jingkren laplah jong ki namarba kim tip ïa ka jingshisha ba ka District Council ka leh bad ka Dorbar ka trei.”
“Ka District Council haduh mynta ka trei na ka bynta jong ngi ki Khasi ym dei na ka bynta kiwei ki jaidbynriew,” la ong ka Kong Marweiñ.
“Kato ka jaka (naduh Bimola ter ter shaduh Motphran) kam dei ka jaka jong ka Municipal ka dei jong ka Hima Mylliem. Lada ong ba ka dei ka jaka jong ka Municipal, ki dei ban pyni ïa ki kot ki sla, ïa u pud u sam. Ba phin kynthoh ïa ka District Council bad ïa ka Hima Mylliem ngi ki seng ngin ym aili ïa kito kiba pynthohbria ïa ka ri Khasi jong ngi,” ong shuh shuh ka Kong Marweiñ.
“Phin shu leh Benami, lane phin shu kam ïa ka jong ki briew hynrei ynda khynra Trading License ki mih da ki Khasi hangto, kito ki bar jylla hangto ki dei kiei? Ki nongtrei jong phi? Pynshisha, u dei u bahaing ne u lok jong phi ne u khun jong phi? Phin shu kam kat ïa kaba don kam lah ban long,” la kynthoh ka Kong Marweiñ.
“Ki khun Khasi jong ngi, tang ban die wai dong kim ïoh, hynrei ki (bar jylla) ki ieng hangto ki die alu muri, ki die aiu aiu mano ba kyrshan ïa ki? Lada don ka jingjia hapdeng u bar jylla bad u Khasi, shah kem u khynnah Khasi. Kum ka longkmie Khasi nga pynrem ïa kito ki jait jinglong. Kum ka longkmie phi dei ban long kum ka longkmie ban mih na ka bynta ka ri bad ka jaidbynriew. Ki longkmie lada ki long ha kato ka rukom ka ri bad ki khun jong ngi shano kin leit? Ki khun shynrang jong ngi, ki dei ki waitlam, ma ngi ngi dei ka stieh ban ïada ïa la ka ri ym dei ba ngin shu ïaid ruma,” la bynrap ka Kong Marweiñ.
