Shillong, Nailar, 31: Ki Pulit jong ka East Jaiñtia Hills District ha ka sngi balang ki la ïohkem ïa u briew uba donkti ban bei tyngka ia ki nongkhaii ban thied ïa u drok uba long u jingdih ba la kheiñ be-aiñ. Ïa une u Jehangir Alom uba sah ha Lakhimpur, Assam la ïohkem da ka jingïarap lang jong ki Pulit ka Jylla Assam.
U Superintendent of Police jong ka East Jaiñtia Hills District u Jagpal Singh Dhanoa, ha u kyrwoh ba la phah sha ki lad pathai khubor, u la ïathuh ba ki Pulit kiba la pynlong ïa ka jingtohkit bad ka jingbuddien kaba bniah ha kaba ïadei bad ka case ba la rejister ha Khliehriat Police Station hapoh ka Section 21(c)/29 jong ka NDPS Act, ha ka 30 tarik, mynta u bnai la ïohkem ïa u Jehangir Alom na Lakhimpur bad la wanrah sha Khliehriat bad la tian bishar ha Kashari.
“Lah ban pynkynmaw, ha ka 19 tarik, Jylliew, 2023, ki Pulit jong ka East Jaiñtia Hills ki la ïohkem ïa ki arngut ki snar nongkhaïi drok ïa kiba la tip kyrteng kum u Biaklian Guite bad ïa u Imliakum Longkumer, na BMS Fuel Station, Nongsning, katba ki dang shong da ka kali Tata winger kaba don ïa u nombar NL-07-T-0815 ha kaba la ïoh kurup ïa u suba drok Heroin uba don ka jingkhia kaba 2.738 Kg na ka kali,” la ïathuh u SP.
Katkum ka jingai jingtip jong u SP, kiba la shah kem ki long u M. Tuanbiaklian Guite (32 snem) uba sah ha Churachandpur, Manipur, u Imliakum Longkumer (40 snem) uba sah ha – Dimapur, Nagaland bad u Jhangir Alom (34 snem) na Lakhimpur, Goalpara, Assam.
Na kine kiba la shah kem ki Pulit ki la ïoh kurup ar tylli ki mobile phone, ka pisa T. 2500 bad kawei ka kali Tata Winger NL-07-T-0815.
