Shillong, Naitung, 04: Ka Hynñiewtrep Integrated Territorial Organisation (HITO) ka la thoh sha u Myntri ka tnat Kam Pohiing jong ka Sorkar Pdeng u Amit Shah ban kyntu ïa ka Sorkar ba kan pyntreikam noh ïa ka Inner Line Permit (ILP) ha ka jylla Meghalaya baroh kawei.
“Ngi ngeit skhem ba ka jingpyntreikam ïa ka ILP kan pnkhlaiñ ïa ka jingshngaiñ ha khappud da kaba pyrkhing ïa ka jingrung jingmih laitlan, ban ïada ïa ki trai ri trai muluk bad ban pynneh ïa ka jingbun briew, ban ïarap ban lap bad khanglad ïa ka jingwan rung jong ki kynhun pyrshah ri bad ki nongleh kam sniew bad ban pynkhlaiñ ïa ki jingpyrshang jong ka ri pyrshah ïa ki kam lehnoh bad ka jingrung tung na khappud,” la ong.
“Ka jingdonkam ban pyntreikam ïa ka ILP ha Meghalaya kam dei shuh tang ka kam ïada ïa ka kolshor hynrei mynta ka la long ka jingdonkam ba kongsan na ka bynta ka jingmyntoi jong ka jingshngaiñ ha ka ri. Ngi, namarkata, ngi kyrpad ïa ka ophis ba donburom jong phi ban pyrkhat kyrkieh bad pynsted ïa ka jingpyntreikam ïa ka ILP sha Meghalaya, da kaba ïamir jingmut bad ka Sorkar Jylla bad ki bor synshar shnong,” la ong ka Seng.
Ka HITO ka la ong ba ka jingïakynad kaba dang shen bad ka jingsangeh noh ïa ka thma hapdeng ka India bad ka Pakistan ha shilynter ka phang sepngi ka la pynpaw biang sa shisien ïa ka jingdonkam ban pynkhlaiñ ïa ka jingïada hapoh ka ri ha kylleng ki jaka khappud, kynthup ïa kito kiba don ha ka thaiñ Shatei Lammihngi.
Kaba kham sngewkhia ka long ka jingïoh jingtip kaba bniah ha kaba ïadei bad ka jingkiew ka jingjingwan rung tuh ha khappud ka India bad ka Bangladesh, kynthup ïa ka Meghalaya, bad ka jingbuh ïa ka ktem ba kongsan jong ka ISI na ka ri Pakistan ha Bangladesh, kaba buh jingma kaba khraw ïa ka jingshngaiñ jong ka ri.
Ha kum kane ka jinglong jingman, ka jingjur na ki jingwan rung be-aiñ sha Meghalaya ïa kaba la kynnoh ba la khring da ka jingpynbor ban siew pisa, ka pynmih ïa ki jingsngewkhia kiba jur, la ong ka seng bad bynrap ba kine ki kam kim dei tang ka jingpynkheiñ ïa ka jingsynshar jong ka ri India hynrei kin long ruh ki khyrdop rung ba pynsuk ïa ki nongleh kam sniew ne ki kam lehnoh kiba lah ban pynthut ïa ka imlang sahlang bad ka thaiñ.
Shuh shuh, ka HITO ka la kdew ruh ïa ki khubor ba la jyllei ki kot ki sla kiba thok, kynthup ïa ki hajar tylli ki Aadhaar bad ki EPIC Card thok kiba la pyndonkam da ki nongrung tuh ban ïoh ïa ki skhim jingïarap bad ban ïasoh bad ki nongshong shnong. Kane ka dei ka jingeh kaba la donkam ban pynbeit noh kyrkieh.
Ka la pynpaw ruh ïa ka jingjia pynïap briew dang shen ha Sohra, da ka jingdonkti jong ki riewshimet na shabar ka thaiñ, khamtam eh na Madhya Pradesh, ka pynpaw ïa ka jingdonkam ban don ki lad pynïaid kiba kham bha ban buddien bad peitngor ïa ka jingwan rung jong ki briew ki bym dei ki trai shnong sha ki jaka ba kham synjor jong ka Jylla Meghalaya.
“Da kaba kdew ïa kine ki jingjia, ngi kyntu ban pyntreikam mardor ïa ka Inner Line Permit (ILP) sha baroh kawei ka Jylla Meghalaya. Ka ILP, kumba ka treikam ha kiwei pat ki Jylla jong ka thaiñ Shatei Lammihngi, ka la paw ba ka long ka aiñ kaba kongsan bha kaba ai jingïada hapoh ka Bengal Eastern Frontier Regulation Act 1873 ka ban ïada ïa ki riewlum bad ban khanglad ïa ka jingroi briew bad ka jingpynneh pynsah ïa ka kolshor,” la ong shuh shuh ka HITO.
