Shillong, Nailur, 14: U MDC ka BJP na Tura u Bernard N Marak u la pynshong nongrim ïa ka jingbym urlong jong ka Garo Accord halor ka jingbym don u Myntri Rangbah ka Jylla ba la khlad noh u PA Sangma sha ka jingïasoi ha Delhi ha ka 24 tarik Nailur, 2014. U Marak u kynnoh ba ka jingbym don jong u PA Sangma ka dei ka daw bah kaba la pynlong ïa kane ka jingïateh soskular ban pynsahkut ïa ka jingïaid shaphrang.
Katkum ka jingong jong u, u PA Sangma u la pynpaw ïa ka jingsngew artatien halor kane ka jingïateh, da kaba kdew ïa ka jingsngewkhia ba ka jingpynkupbor ïa ki Autonomous District Council (ADC) kan wanrah ïa ki jingïakynad bad ka bor jong ka jylla halor ka kam pynroi.
U Marak u kynnoh ba u PA Sangma u la ai jingmut ba ki ADC kim lah ban pynïaid ïa ki jingïoh bhah kiba heh bad ba ka jingai pisa beit beit kan lam sha ka jingpyndonkam bakla khlem da don ka jingtreikam kaba khuid bad kaba shai.
Ki jingkam jong u Marak ki pyni ba ka jingbym da pynpaw than jong u P.A Samga ïa ka Garo Accord ka la ktah jur haor ka jingpyntreikam ïa ka.
“Ka jingshisha balei ba ym la shimkhia ïa ka Garo Accord da ka Sorkar ba la ïalam da u Conrad Sangma ka dei namar ba u P.A.Sangma (ba la khladnoh) um shym la leit sha ka jingïalang ïasoi ïa ka “Historic Garo Accord – Agreed Text Settlement” ha Delhi, ha ka 24 tarik, Nailur, 2014. Haba ki nongsoi ki la leit jngoh ïa u ha kata ka janmiet ban ai khublei ïa u namar ka jingkyrshan jong u ban wanrah ïa ki seng lehnoh sha ka miej jingïakren, lyngba kaba la ïasoi khatduh ïa ka Garo Accord, u la shu ong ba um sngewtynnat ban ïadon bynta lang. U la don ha Delhi ha katei ka sngi hynrei ka jingbym don lang jong u ka la pynmih bun ki jingkylli namarba ka jingsoi ka i kumba kam pat biang khlem ma u namarba ha ki nongïalam jong ki seng lehnoh, u la long kum u kpa. U MP barim jong ka Rajya Sabha ruh u la don hangtei ha ka por ba ki nongïalam jong ka kynhun ba ïapait ki la leit ban ïakynduh ïa u ha kata ka janmiet da kaba kyrmen ban kylli bniah ïa ka koit ka khiah jong u namarba um shym la don ha ka por ba ïasoi ïa ka jingïateh soskular. Ki nongïalam ki la sngewnguh ïa u na ka bynta kiba bun kiei kiei khamtam eh namarba u la long u nongïarap ban wanrah ïa ka jingïasangeh ïasiat ha u snem 2004,” la bynrap u kyrwoh.
“La ïathuh ha ki nongïalam ba ka jingsoi ïa ka Garo Accord ban pynkupbor ïa ki Autonomous District Council (ADC) ka dang kloi palat namarba ka Meghalaya kum ka Jylla ka dang kiew dang tang ha katei ka por. La ïathuh ha ki nongïalam ba kan jin da la bha ban bteng beit ïa ka jingïakren ha ka jaka ban ïapynbeit ka ban wanrah ïa ka jingïatyngkhuh ïa ka bor synshar ka Jylla halor ki song pynroi kaba wan na ka Sorkar Pdeng bad kaba la pyntreikam da ki tnad Jylla ha ki jaka kiba hap ha ka Sixth Schedule,” u la ong.
“Ki ADC kim pat lah ban pynïaid bad pyndonkam ïa ka pisa kaba bun kaba wan na ka Sorkar Pdeng bad kata ka jingai pisa beit bei kan pynshoi ïa ka Council ban pyndonkam bakla ïa ka pisa khlem kano kano ka jingtreikam kaba khuid bad kaba shai,” la ong u Marak bad bynrap, “la kdew ruh ba dei ban bujli noh ïa ki ADC ha Meghalaya da ka rukom synshar kum ka Panchayat ha ki shnong ki thaw na ka bynta ka song kaba wan na ka Panchayati Raj. Ka jingïateh jong ka Garo Accord kan pynmih ïa ki jingïatakhuh ym ïa ka jingpynbeit ha ka kyrdan jong ka Jylla. Ka bor laitluid jong ki ADC kan long kaba ïatakhuh ïa ka bor ba la don lypa jong ka Sorkar Jylla namarba ïa ka soskular yn pynïaid hi da ka Jylla. Ïa ka jingïasoi ym shym la sngewnguh ha ka jingshisha katba ka jingïakren ka la ïaid hynrei ki nongïalam ki la duh mynsiem da kaba ong ba ka jingïasoi kam long kaba bniah. Ki nongïalam ki la sngewsih ban ïohsngew ïa kita ki kyntien namarba ym shym la khmihlynti hadien ba la ïarap ha kiba bun ki kyrdan ha ka saiñpyrthei bad ha ka jinglong shimet ha kine ki snem. Kumta bunsien, ki seng lehnoh ki la long ki nongïarap ban thaw ïa ki Executive Committee ha GHADC bad ki la ïarap ha ka por elekshon ban ïarap ban thaw ïa ka Sorkar ha ka Jylla.”
“U P.A Sangma uba la khlad noh, u la thung hi ïa la u jong u nongïasaid aiñ ban mudui pyrshah ïa ka jingkheiñ beaiñ ïa ka ANVC lyngba u Amit Kumar uba long mynta u Advocate General ha Meghalaya. Kine ki jingshisha baroh mynta la ïohi kum ki daw balei ba ka Garo Accord kaba thmu ban pynkhlaiñ ïa ki ADC jong ka Meghalaya kam shym la urlong. Wat haduh mynta, ki ar tylli ki kynhun ba ïapait ka ANVC ym shym la leh markatjuh kaba la pynlong ïa ka jingduh bun bun snem ka jingïaid shaphrang ka jinglaitluid ha ka jingtreikam jong ki ADC,” u la bynrap.
