Shillong, ïaïong 16: U MLA ka BJP na South Shillong Constituency Bah Sanbor Shullai ha ka sngi Baar u la ong ba lada ka Kong Ampareen bad ka Agatha Sangma ki ioh rah ia ka jingjop, ngin ioh ki nongmihkhmat Kristan kiba khlaiñ ha ka Sorkar. Namar lada baroh arngut kin ioh rah iaka jingjop ki lah ban rah bad ban kren naka bynta ka bha ka miat kaba iadei bad ki Kristan, namar ki don bynta lang bad ka sorkar. Ka Jinglong pyrshah Kristan daka liang pyrshah kan tlot lada baroh arngut kin Shah jied na Meghalaya.
U Bah Sanbor ba la mihkhmat bunsien u la ong ba ki nongmihkhmat ne MP na kiwei pat ki Seng kin nym lah ban leh shibun kiei² ha ka iing dorbar thawaiñ ka ban don la kumno² 400 ngut ki dkhot kat kum ka jingwad bad lum jingtip jong ki tyllong wad jingtip. Ban phah da ki nongmihkhmat na ka seng Congress ne na ki seng riewlum kan pynlehnohei ne pynduh jingmyntoi haduh 5 snem ia ki paidbah.
U nongmihkhmat na ka BJP u la kynthoh jur ia kiwei pat ki seng saiñ pyrthei kiba la ju kynthoh iaka BJP ha ki rynsan.
U Bah Shullai u la ai jingmut ruh ia ki paidbah khamtam iaki samla bad iaka imlang sahlang ba kiwei ki seng saiñ pyrthei ki la shu pyntieng kohtympan ban dup ioh ia jingkyrshan ha Meghalaya.
Ngi dei ban iaid shaphrang bad puson bha ha ka ioh ka kot, ym ban pyn pharia iaka imlang sahlang jong ngi. Lada ki nongjied nongmihkhmat ki kwah iaka Shillong ban don beit ha ka jingsuk ki dei ban pynmih la ki Sur ha ka 19 tarik u iaiong, 2024, u la ong.
Khlem ka jingshong suk yn nym don ka jingiaid shaphrang ha ka ioh ka kot ka jylla . Ka Shillong ka dei ka jaka ba don ka lad ban kiew rasong ha ka IT ha kane ka thaiñ shatei lam mihngi bad kan iarap ia bun ki samla bala dep pule ban ioh kam. U paidbah u dei ban sngewthuh ba khlem ka jingshong suk shong shngaiñ ym lah ban kyntiew iaka ioh ka kot. Da ka jingkyrshan naka jylla bad ka sorkar pdeng, ngin ieng tylli lang bad nym shah ba ki jingsniew kin wan ha ka jylla jong ngi,” ong u Bah Sanbor Shullai.
U Bah Sanbor u la ong ruh ban pharia ia ka vote hapdeng ka NPP bad Congress kan ai jingmyntoi tang ia ki kyrtong Jong ki seng riewlum namar kin ym don sur ne lah leh eiei ha ka dorbar ba bun da ki kyrtong ka NDA. U la pynkynmaw ruh ba kiba bun ki nongialam BJP ha ka jylla jong ngi ki dei ki kristan ba shitrhem bad ngin kren bad ieng na ka bynta ka jingbha jong ki kristan . ” Ngi kut jingmut ba ngin iada iaka jingdonkam jong ki paid Kristan, ki Seng Khasi, Sein Raij bad baroh kiba shong ba sah hapoh ka jylla Jong ngi,” ong u Bah Sanbor.
