Shillong, ïaïong, 16: Ka Khasi Students’ Union (KSU) ha ka sngi Baar ka la mudui sha u Symbud Myntri Rangbah ka Jylla uba peit ïa ka tnat Kam Pohing Bah Prestone Tynsong halor ka jingkynnoh ba ki Pulit ki la pyndonkam bakla ïa ka itkiar bad ka jingkem khlem nongrim da ki Pulit ka Laban.
Ha ka shithi ba la phah sha u Symbud Myntri Rangbah u President jong ka KSU Laban Circle u samla Reuben Najiar u la kynnoh ba ka rukom treikam jong ki Pulit ha Laban bad ka tnat baroh kawei ka long kaba noh shiliang ka tarajur, ba khlem nongrim, leh bym hok khamtam ïa ki Khasi kiba hap ban mad ïa ki jingshah leh shiliang bad shah pynmong ha ki kti jong ki nongbat aiñ.
“Ka Union ka kwah ban kyntu ïa phi ban shim ïa ki lad ki lynti ban pynjanai ïa ki rukom treikam jong ka tnat Pulit ha ka Jylla namarba ka jingpyndonkam bakla da ki Pulit ïa ka iktiar ha ka Jylla ka la long shaba palat liam. Ban pynbeit ïa kine donkam ïa ka jingtrei shitom jong ki bor sorkar, ki kynhun sengbhalang, ki kynhun bapher bapher bad ka imlang ka sahlang. Ki bor jong ka aiñ ki dei ban bat ïa ka aiñ, ban ïada ïa ki hok longbriew bad ban long ki nongïada ïa ka hok jong ki nongshong shnong,” u la ong.
U la maham, “nangne shakhmat, ka Union kan ym lah shuh ban shu sngap kum ïa kine ki jingshah leh bym hok pyrshah ïa ki Khasi bad ïa ki dkhot ka KSU bad lada kum kine ki jingleh khlem nongrim kin dang ïai bteng, ka jingïakhun pyrshah ïa ka tnat Pulit ka lah ban jia ha kano kano ka por.”
U samla Najiar u la ong ba ka rai ban phah ïa kane ka dorkhas ka long hadien ba ka la jia ka jingïashoh kaba rit hapdeng ki ar kynhun jong ki khynnah shynrang (kiba hapdeng ka rta 16-20 snem) ki bym dei ki riewlum bad ki bym dei ki Khasi ha ki bynta jong ka thaiñ Laban tang halor ka kam pan pisa kylliang/knieh. Ki ïa ithuh bha bad ki dei ruh shi paralok.
Hadien ka jingïashoh, ki la ïasuk hi paramaki bad baroh arliang manla ki la leit phai noh sha la ki jong ki ing ki sem. “Hynrei, kaba pynkyndit, ki Pulit jong ka Laban Police Station ki la leit hi sha ki ingsah jong uwei na ki khynnah bym dei Khasi bad phah wan ïa u sha thanat bad hadien ba la pynbor ïa u ban ujor da ka ejahar pyrshah ïa kawei pat ka kynhun ki khynnah Khasi. Une u khynnah um kwah ban ujor ejahar namarba ki ïadei shiparalok hynrei ki Pulit ki la ïai pynbor ïa u. Ha ka por janmiet, ki Pulit ki la khot hajir ïa ki khynnah Khasi sha thanat, bad tang shu poi ha thanat la kem ïa ki bad wat hadien ba ki bahaing hasem bad ki dkhot ka Union ki la ïai tohkit halor ka jingshahkem, ki (Pulit) la kyntait ban ai jubab bad la bthah pynban ban leit kylli na u Superintendent of Police ka East Khasi Hills,” u la ong.
U samla Najiar u la ong, shipor ka la don ka jingpynphriang ïa ka khubor lamler bad ka dur ha Whatsapp ba katto katne ki briew ki la shah dung tari ha Laban bad khladnoh hynrei ka dur ka dei pynban jong uwei u briew uba la khlad noh dang khyndiat sngi.
Ki Pulit ki la kem ïa ki arngut ki khynnah Khasi halor ka case jong ka Laban PS Case No. 21 (04) of 2024 bad ki kyndon ba la pynngat pyrshah ïa ki tang namar i daw iba rit ki long ka Section 307 (thmu ban pynïap), Section 364 (rahbor da ka jingthmu ban pynïap), Section 325 (ba thmu ban pynmynsaw) bad kiwei kiwei ki kyndon hapoh ka Indian Penal Code.
“Ka rukom kaba ki Pulit ka Laban ki la shim halor kane ka jingjia bad kem lah ban ong ba ka dei kaba long shiliang bad kaba wanrah ïa ka jingsngew ïapher jaidbynriew,” u la ong bad bynrap, “ka paw kumba ki Pulit ki pyndonkam ïa ka buit pharia ban pynlong ïa kiwei ki jaidbynriew ban ieng pyrshah ïa ki Khasi bad ban pyndik ïa ki nongshong shnong trai jylla Khasi hapoh ka thaiñ,” u la ong.
U la pyntip ruh ba arngut ïa ki khynnah Khasi la pyllait ha ka sngi kaba bud, ha ka 13 tarik, Ïaiong, 2024 da ka Kashari namarba ki jingkynnoh ki long ki bym shong nongrim.
Haba ïaiban ïa ka jingpyrshah ba pyndonkam ïa ka bor da ki Pulit pyrshah ïa ki trai jylla, u samla Najiar u la ong ba ka Union ka kwah ban pan jingpynshai halor ki rukom treikam jong ka tnat Pulit, ka banyngkong, halor kane ka jingjia balei ki Pulit ki hap ban da pynbor ïa u briew ban mudui ejahar bad la ïohi ruh ïa kane bunsien haba don ki jingjia pyrshah ïa ki bymdei ki Khasi, khamtam pyrshah ïa ki dkhot ka Union ha kaba ki Pulit ki ïaid shakhmat ban pynkhreh da ka ejahar pyrshah ïa ki dkhot ka seng.
U la ong ba ki don ruh ki jingjia ha Laban ha kaba 2-3 ki Khasi kiba shah shoh ha ka kynhun kaba don 10-15 ki bym dei ki Khasi hynrei kiba dei na ka jaidbynriew Muslim ha Laban ha ka 6 tarik, Ïaiong, 2024 hynrei ki Pulit halor kane ka jingjia kim shym la shimkhia eiei ban kem ïa kiba donkti wat haba la pynpaw ïa ka kyrteng bad ïa ka jaka sah jong ki briew kiba donkti ban shoh ïa ki Khasi.
“Kane ka pynpaw shai haduh katno ka jingtreikam shiliang khmat da ki Pulit pyrshah ïa ki trai jylla bad ki don bun tylli ki jingjia lada ïathuh lut hangne,” u la ong.
Haba kynnoh ïa ki Pulit ba ki shu kem da ka bor ïa ki Khasi, u samla Najiar u la ong, “…ki dkhot jong ka Union haba ki buh jingkylli, ka jubab ka long beit borabor ba, ‘ka wan na ki bor ba najrong. Ka Union ka kwah ban buh jingkylli, mano kine ki ‘bor ba najrong.”. Hato ki dei ki heh Pulit, lehse u SP/DGP ne ki Myntri na ka Sorkar Jylla ne Sorkar Pdeng ne kino kino ki kynhun shitniam/riewshimet kiba ïasylla pyrshah ïa ki Khasi bad ïa ka Union.”
Kaba pynlong ban pynpaw ïa kine ki daw hangne, ka long, ka Union ka la lap haba uno uno u Khasi u shah rah ban tohkit lane shah kynnoh ba donkti ha kano kano ka jingjia, ki Pulit kin kylli borabor lada uta u briew u don jingïadei neem bad ka Union bad lada u dei u dkhot ka Union, un shah kem khlem da peit ïa ka jingjia.
“Ka balai, ka Union ka kwah ban kylli, balei ki Puit kim shym la leh eiei pyrshah ïa kito kiba pynphriang ïa ki khubor lamler shaphang u briew uba shah dung tari ha Laban uba la pynphriang ïa ki kyntien jingïasih bad pynthud ïa ka shongsuk shongsaiñ ha Laban kaba don ïa ki nongshong shnong khleh jaitbynriew ne hato ki Pulit ki don sha ka liang jong ki bym dei ki Khasi pyrshah ïa ki Khasi namarba kumba la kdew ïa ka jingjia haneng, ka jingshah kem jong ki khynnah Khasi tang halor i daw barit ka pynpaw shai ïa ka jingthrang snam jong ka tnat Pulit pyrshah ïa ki Khasi,” u la ong.
U la ong shuh shuh, ‘lada ki dkhot ka Union ki pynpaw ïa kino kino ki jingthoh/dur ha ka Social Media pyrshah ïa ki Pulit ne ïa ka Sorkar, ki la shah khot mar mar ha ka Cyber Crime Cell bad shah pyndik katba ha kane ka jingjia, balei ki Pulit ki sngap jar. Na ka por sha ka por, ki dkhot ka seng bad ka jaidbynriew Khasi baroh kawei ki la long ki sohpdung kum ha kine ki jingshah leh bym hok, ki jingleh shiliang khmat da ki Pulit bad kiwei kiwei.
