Shillong, Jylliew 07: U Nongïalam ka Voice of the People Party (VPP) u Bah Ardent Miller Basaïawmoit u la kyntu ïa u Myntri Rangbah ka jylla Assam u Himanta Biswa Sarma ban peit shwa ïa ka kper jong la jong kaba don shadien ïing ha shwa ba un tuklar bad ki kam jong ka jylla Meghalaya.
Haba pynrem ïa ka jingkren jong u Sarma ba dei na ka daw jong ka niam kaba la treikam hapoh ka jylla Meghalaya ba ka la wanrah ka jingrem jong ka NDA ha ka Lok Sabha ilekshon kaba dang shudep, u Bah Basaïawmoit u la ong, “Kane ka dei ka khubor kaba nga kwah ban phah sha u Himanta Biswa Sarma, uba dei u Myntri Rangbah ka jylla Assam, uba la ju mlien ban kren ïa ka bym dei bad kaba bakla ba u dei ban peit shwa ïa la ka jong ka kam bad ruh ba un sumar bha ïa la ka jong ka kper jong u kaba don sha lyndet ïing. Um don hok ban tuklar ïa ki kam jong ka jylla Meghalaya ha kaba ïadei bad kane ka parliamentary election kaba dang shudep.”
“Hapoh ka ri kaba synshar paidbah kum ka India, ki paidbah ka Meghalaya ki don ka hok ban jied ïa uno uno u briew katba u dang dei u nongshong shnong jong ka ri India bad uba long uba bit dor ban long u kyrtong. Ki nongshong shnong ka Meghalaya kim dei shuh kiba dang kyllung ha ka jingmut jingpyrkhat, bad ki tip bha ïa ki agenda bad ki mat treikam jong ki seng saiñ pyrthei ba kin shim bynta ha kane ka election. Bad kum ki nongshong shnong jong kane ka ri kaba synshar paidbah ngi don ka hok ban jied ïa kano kano ka party kaba ngi kwah,” u la bynrap.
Haba ong ba ki Balang hapoh ka jylla Meghalaya kim ju donkti hapoh ki kam saiñ pyrthei, u Bah Basaïawmoit u la ong, “Kum ka kynhun ne ki shnong ngin jied ïa ka party ne u kyrtong kiba ngeit hapoh ka riti synshar jong ka ri India, kiba burom ïa ki kyndon jong ka riti synshar jong ka ri India, kiba ngeit ha ka jingngeit niam kaba laitluid bad ka party kaba ïada ïa ka bha ka miat jong ki kynhun rit paid. Namar kata phim lah ban khmih lynti ba kum ki khristan, ban vote ne jied ïa u ne ka briew, kiba dei na ka party kiba ïeng pyrshah ïa ka riti dustur jong ka ri India, kiba long ka daw jong ka jingma ïa ki rit paid jong ka ri bad kane ka dei ka hok jong baroh ki nongshong ban shim ka rai.”
“Namar kata nga pynrem jur ïa kane ka jingkren jong u Sarma kaba ym don ka jingshisha, kaba khlem nongrim bad kaba long pyrshah niam. Ka jingkren jong u ka long ban ïalam bakla ïa ki paidbah bad ban wanrah ïa ka jingbym shongsuk shongsaiñ hapoh ka ri. Nga thikna ba kiba bun ki jingkren jong u ki la wanrah ka jinglehraiñ ïa ki nongshong shnong ka jylla Assam bad ka la ktah bha ruh ïa ka jingsngew jong ki nongshong shnong ka jylla Meghalaya,” ong u nongïalam ka VPP.
