Nongstoiñ, Jylliew 07: Uwei u rangbah ba la tip kyrteng kum u bah Bronly Pariong 56 snem, u khun jong u (L) Bah Ka Sohshang na ka shnong Tiehsaw (Tiehsawbah) Myrïaw Syiemship, u la jah rngai naduh ka 5 tarik mynta u bnai bad um shym pat la wan phai satia sha ïing.
Halor ka jingjah rngai, ka Kong Aibi Syiem ka la ujor da ka ejahar da kaba kdew ba u Bah Bronly u la mih na la ïng naduh ka 30 tarik Jymmang 2024 ha ka por 6 :00 baje mynstep ha kaba u la ong ba un leit trei bylla sha ka shnong Lawmei East Khasi Hills District.
Hynrei, ha ka 1 tarik mynta u bnai Jylliew ki la ïoh jingtip na ki bahaïing jong u kiba don ha Lawmei, ba um shym la wan poi satia ha katei ka shnong bad haduh mynta kim shym tip satia shaei u don.
La ong ruh ba u Bah Bronly u don ïa ka met ka phad kaba biang briew, ki khmat kiba biang, u shñiuh u ba ïong bthuh, ki bniat kiba biang, u don ka jingjrong kumba san phut, u phong da ka tupia rong ping dum, ka jaket rong grey, ka patlun ïong, u phong ruh da ki slipar ba rong jyrngam.
U ju mlien ban dih kyiad, dih duma, u kren da ka ktien Khasi bad u dei ruh na ka niam Khristan.
Lada don kino kino kiba lap ne ïakynduh ïa u, kin sngewbha ban pyntip sha ki Police Station kiba marjan.
