Shillong, Nailar, 09: Kum shi bynta ka jingrakhe ia ka sngi ba la pynkha ia ka Indian Youth Congress (IYC), ka Meghalaya Pradesh Youth Congress (MPYC) ha ka sngi Balang ka la iashim bynta lang ban rakhe ia kane ka sngi, da kaba pynher ia ka lama jong ka Indian Youth Congress (IYC) ha ophis treikam jong ka seng ha Congress Bhavan, Shillong.
U Vice President jong ka Meghalaya Pradesh Youth Congress (MPYC) u Samla Banphira Basaiawmoit ha ka jingiakren bad ki lad pathai khubor u la ong ba ka jingrakhe ia kane ka sngi, kan long ban pynrung sha ki para samla ha kane ka jylla Meghalaya bad ha ka ri India baroh kawei ia ka mynsiem ban shakri ia ka imlang ka sahlang, ban kyntiew ia ka jylla Meghalaya ha baroh ki liang.
U la ong ruh ba haduh mynta hi ka Congress ha kane ka Jylla Meghalaya ka dang khlain bad kum ka party ka donkam ban leh bun kiei kiei khnang ban ioh biang ia ka jingshaniah jong ki paidbah.
Ha kajuh ka por u la ong shuh shuh ba ka jingleit phai biang jong u Rahul Gandhi kum u MP jong ka Lok Sabha kan nang pynkhlain shuh shuh ia ka seng Congress bad kan nang ai mynsiem shuh shuh ia ki paidbah nongshong shnong ha ka ri India.
