Shillong, Nailar, 01: Ka Meghalaya Clean and Green Organisation (MCGO) ha ka sngi Balang ka la phah da ka dorkhas sha u Myntri Rangbah ka Jylla u Conrad K. Sangma uba peit ïa ka tnat Forest and Environment ban pynpaw ïa ka jingpyrshah ban aiti ïa ka jaka khlaw na ka bynta ka jingpynbhabriew ïa ka Pung Umïam.
“Ka don ka jingangnud ban pynbhabriew ïa ka pung Umïam da ka Sorkar Meghalaya bad ban pynneh pynsah ïa ka jingjyrngam. Da kane ka thong ban pynbhabriew kan kynthup ruh ïa ka jingtih pynryntih ïa ki lum bad ka jingpynjot ïa ka jaka khlaw kaba ker sawdong ïa ka pung Umïam. Ka khlaw kaba ker sawdong ïa ka pung Umïam ka dei ruh ka iing sah jong kiba bun ki jaid jingthaw ba kyrpang jong ki syntiew ki skud, ki mrad ki mreng,” la ong ka dorkhas ba la soi da u President u Bah RG Warjri bad u Organising Secretary u Bah S. Nongkhlaw.
“Ka Organisation ka sngewkhia halor kane ka jingthmu khlem da peitbniah ne khlem ïada ban pynthikna ba kan ym don ka jingshah ktah ïa ki jingthaw ba kyrpang. Ka Meghalaya ka dei ka jylla ba la kyrkhu da ka jingdon byllai ki syntiew ki skud, ki mrad ki mreng bad ka jingrben ki khlaw ki btap. Ka jaka khlaw kaba ker ïa ka pung Umïam ka long ruh kum ka Carbon Sink kaba kjit ïa ka lyer jaboh ba la pynmih na Sor Shilong bad kane kajuh ka khlaw ka pynmih bujli pat da ka lyer kaba khuid sha ka mei mariang. Kumba baroh ngi tip, ka jingshah ktah jong ka mariang kan wanrah ruh ïa ka jingkylla dur tang ha ka shi khyllipmat lada pynthud,” ong shuh shuh ka dorkhas.
Kine ki nongïalam ka Organisation ki la pyntip ba la pynkha ïa ka Meghalaya Clean and Green Organisation (MCGO) ban ïada ïa ka mei mariang. “Ka Organisation kam pyrshah ïa ki kam pynroi hynrei ka ïohi ba ka jingthmu ba ka projek pynbhabriew ïa ka pung Umïam kan ktah ïa ki sawdong sawkun jong ka mariang lada ym don ki kyndon (Standard Operating Procedures) ba thikna,” la bynrap ka MCGO.
Ka MCGO ka la kdew ruh ïa ka hukum ba la pynmih da ka Ingbishar Supreme Court bad ong ruh ba ka thong hi ka long ban pynthikna ba ki kam pynroi kim dei ban shah pynsangeh hynrei kam dei ban long pat kaba ktah ïa ka mariang.
Ka Organisation ka la kdew ruh ba ka jaka khlaw kaba ker sawdong ïa ka pung Umïam ym tang ba ka ïada jinglong jingman jong ka pung Umïam hynrei ka dei ruh ka ingsah jong kiba bun ki jingthaw. “Ban aiti ïa ka jaka khlaw na ka bynta ka jingpynbhabriew kan wanrah ïa ka jingpynjulor bad ka jingbym don jingmut shuh ïa ka jingtrei shitom jong ka jylla ban ïada bad ban pynneh pynsah,” la bynrap ka MCGO.
“Ka MGCO ka ïaiban sa shisien ba kam don jingpyrshah ha ki kam pynroi, tangba ki kam pynroi kim dei ban ktah ïa ka mei mariang. Ka Sorkar ka dei ban kynmaw ba ka jingpynneh pynsah ïa ka mariang ka dei ka bynta kaba kongsan tam ruh ban pynneh pynsah ruh wat ïa ki mrad ki mreng bad ki dieng ki siej,” la pynkut ka dorkhas.
