Shillong, K’lyngkot, 27: Ka Ministry of Home Affairs jong ka Sorkar Pdeng, hashwa ba ka ri baroh kawei kan rakhe ia ka Republic Day, ka la pyllait ia ki kyrteng jong ki riew pawkhmat ha ka ri ki ban ioh pdiang ia ka Khusnam Padma Award mynta u snem.
Ka long kaei kaei kaba sngewtynnad bad kaba sngewsarong ia ka jylla Meghalaya ha kaba ka Kong Silbi Passah ka la shah jied ban ioh pdiang ia ka khusnam Padma Shri mynta u snem 2024.
Ka Kong Silbi Passah ka dei kaba shong basah ha Riatsamthiah, Shillong bad ka dei kaba la pawnam bha ha ka jylla ha kaba iadei bad ka jingpynneh pynsah bad ban pyninam ia ka rukom tem bad rukom shad tynrai.
Ka Kong Silbi kan pynkhreh mynta ban leit ban shimti ia kane khusnam na ka kti jong ka President jong ka ri India ha ka jingialang ka ban sa long ha Rashtrapati Bhawan ha u Lber ne Iaiong mynta u snem.
Ka Kong Silbi Passah kan long ka nongshong shnong kaba ar hapoh ka Shnong Riatsamthiah ban shah jied na ka bynta ban ioh pdiang ia kane ka khusnam bad shwa kane ka Kong Silverine Swer ka la long ka kynthei banyngkong eh hapoh kane ka shnong ban ioh pdiang ia ka khusnam Padma Shri.
