Shillong, K’lyngkot, 27: Kum ka jingpynshlur ia ki samla pule, ka Seng Samla Shnong Umpling ha ka sngi Thohdieng ka la pynkup burom ia ki 13 ngut ki samla jong ka shnong kiba la pyndep ia ka jingpule ha ki kyrdan bapher bapher.
Ia kane ka jingsam khusnam la tip kum ka Academic Excellence Award ia kaba la bei tyngka da ka Chief Minister Special Grant, ha kaba u Chief Executive Member (CEM) jong ka Khasi Hills Autonomous District Council u la long kum u kongsan.
Nalor kine ki 13 ngut, ka Seng Samla Shnong Umpling ka la pynkup burom kyrpang ruh ia ki ar ngut ki samla jong ka shnong kiba la tyngshain bha kiba kynthup ia u Bah Shanbor Warjri uba la long u u Additional Deputy Commissioner jong ka East Khasi Hills District bad ka kong Quinnie Fancon kaba la pass ia ka eksamin MPS.
Haba kren kum u kongsan u Bah Pyniaid u la ong ban lait na ka jingshah synshar ha kiwei pat ki jaidbynriew, ki khun samla jong ka jylla ki dei ban trei shitom khnang ba ki lah ban pass ia ka eksamin IAS ba ju pynlong da ka Union Public Service Commission (UPSC) bad u la kular ba lada don ki khun samla na ka shnong Umpling kiba thrang ban iakhun ia kane ka eksamin u long uba kloi ba kyrshan na ka bynta ka bai Coaching.
