Shillong, Nailur, 08: Ka Kynhun Myntri jong ka Sorkar Jylla kan dang bishar bniah bin ba bin ïa ka kaiphod bad ïa ki jingai jingmut jong ka Expert Committee on the State Reservation Policy ba la aiti sha ka Sorkar.
Ka Sorkar MDA ba la ïalam da ka National People’s Party (NPP) ka la thaw ïa ka Expert Committee on the State Reservation Policy ba la khlieh da u nongbishar ba la shongthait u Justice Moolchand Garg kum u Chairman bad saw ngut ki dkhot hadien ba ka la mih ka jingdawa ban pynbeit thymmai ïa ka bhah thungkam thungjam.
U Myntri ka Sorkar Jylla u Bah Paul Lyngdoh ha ka jingïakren bad ki lad pathai khubor ha ka Lah Sngi U Blei u la ïathuh ba ki kyndon treikam jong ka Committee ka long tang ban shu bishar halor ka Reservation Policy bad ban phah ïa ki jingai jingmut lada donkam, ban ïasyllok bad ki kynhun bapher bapher bad ban leit jngoh ruh ïa ki bynta bapher bapher ka jylla ban ïoh ïa ki jingpynsngew na ki paidbah nongshong shnong jong ka jylla.
“Mynta ka step, ka Kynhun Myntri ka la shimkhia halor kane ka kaiphod bad ïa ki jingai jingmut bad ka la rai ban bishar shwa bin pa bin. Ka dei ka kaiphod kaba rben kaba don da ki hajar sla,” la ong u Bah Paul.
“Ynda ngi la bishar bad khmih sani bha ïa ki jingai jingmut ngin sa lah ban shim ïa ka rai halor ki jingai jingmut jong ka Committee,” u la bynrap.
“Mynta ba ngi dang shu pdiang ïa ka kaiphod, kan dang shimpor ban shim rai,” la ïathuh u Bah Paul.
Haba kylli, u la ong, “namarba ka dei ka kaiphod kaba rben sla, kin don ki mat ïa kiba yn hap ban pynneh ïa ka status quo bad ki don ruh ki mat kiba thymmai. Ngin ym lah bakla ban shu rak muk mak namarba manla kawei pa kawei ka jingai jingmut ka don la ka jong ka dor bad kaba donkam ruh ban bishar sani bha.”
U la ïathuh ba u Chief Secretary ka Jylla u Bah DP Wahlang u la pyntip sha ka Kynhun Myntri halor ka kaiphod. “Namarba ngi ruh ngin sa don la ki jong ki jingkylli kiba donkam jingpynshai, namarkata, kan shimpor bha ïa ngi ban shim ïa ka rai halor ka kaiphod.”
Haba kylli shuh shuh, u la ong, “Haoid, ka Sorkar ka don ïa ka lad ban pdiang ne kyntait ïa ki jingai jingmut. Hynrei ha kaba khatduh ki jingai jingmut kin dei hi tang ki jingai jingmut hynrei ka rai kaba khatduh ka shong beit ha ka sorkar jylla.
