Shillong Jylliew 01: U nongialam ka Khasi Students Union (KSU) samla Lambokstar Marngar ula ong ba ka seng kam lah ban sngewthuh ia ka jingthmu jong ka sorkar ban pyniasoh ia baroh ki kolej bad ka Capt. Williamson Sangma State University kaba don ha West Garo Hills.
Ha ka jingiakren bad ka Batesi Tv u samla Lambokstarwell Marngar, ula ong ba ka seng kam kwah ban don ka kynrum kynram kumba la long ha u snem 2005 kaba la don ka jingdkoh ha ka rukom treikam ka MBOSE ha Tura.
U la ong ba ka rai ba la shim da ka sorkar ka long kaba syndet syndet khlem da don ka jingiasyllok bad ki nonngpyniaid jong ki kolej ha kane ka jylla.
Katkum ka jingong u bah Lambokstar, “ha ka jingsngewthuh jong ngi, ka jingthmu jong ka sorkar ka long ba ioh lehse ka jingmih ka CUET eksam bad lada ki kolej ki ba don ha ka jylla ki iasoh noh bad ka Williamson State University kin lait na ka CUET eksam.”
U la ong ba ka sorkar ka pheil ha baroh ki bynta namar ba ha ka jaka ba kan pynshlur bad ai mynsiem ia ki samla ba kin iakhun ia ka eksam bapher bapher ban shut ia ka jabieng jong ki, hynrei ka khein sting bad kam shym la shim ia ki lad ki lynti ban btin ia ki samla pule ban kyntiew ia ki sha ka kyrdan halor khnang ba kin lah ban iakhun pyrshah bad kiwei pat ki samla pule na kiwei pat ka jylla.
Haba iadei bad ka CUET, ka seng ka pynshlur ia ki samla ba kin iakhun beit hynrei kaba sngewsih ka long ba ka sorkar kam shym la lah ban pynbiang ia ki jingdonkam.
U la bynrap ba ka sorkar kam lah ban shu thet kti, namar kiwei ki jylla ki la pynkhreh shaid shaid ia ka CUET, hynrei katne snem ka sorkar ha kane ka jylla balei kam shym la lah ban pynbiang ban pynsuk ia ki samla.
Halor ka rai ka sorkar ban pyniasoh ia ki kolej bad ka Capt. Williamson State University u bah Lambokstar, ula ong na ka liang ka seng , ha shwa ba kan shim ia kano kano ka sienjam ba khatduh, kan sa leit ban iakynduh ia ki Principal bapher bapher ban twad jingmut halor ka jingsngew jong ki.
“Ynda ngi la lah ban lum thup ia ki jingai jingmut bad ki jingpysnngew ki kolej ngin sa shong pyrkhat ban pynsngew ia ka sorkar,”u la ong.
