Shillong, Jylliew, 01: Da ka jingthrang ban rat dyngkhong ia u drok u jingdih ba sniew uba la sdang ban suh thied bha hapoh ka South West Khasi Hills, u MLA ka Mawkyrwat u Bah Renikton Lyngdoh Tongkhar ha ka sngi Saitjaiñ u la lum da ka jing iakynduh lang ba kynthup ia ki Rangbah Shnong bapher bapher, u Syiem ka Hima Maharam Paiem Niandro Syiemiong, u MDC ka Mawkyrwat u Bah Carness Sohshang, u Bah Robatjone Kharjarin u ba dei u nongiasaid aiñ kynthup ia ki Seng Longkmie, ki Seng Samla Shnong bad baroh ki sengbhalang kiba don hapoh South West Khasi Hills District kum juh ruh ki kynhun Balang.
Ha kane ka sngi la rai ban aiti da ka jingthoh hakhmat ka Sorkar Jylla bad ban kyntu ia ka Sorkar kan buh noh ia ka jaka ai jingsumar kum ka Rehabilitation Centre bad kiwei kiwei de ki jingdonkam hapoh ka district na ka bynta ki lad jingsumar ia kiba la ngop bad im kyrni ha u drok.
