Shillong, Nailur, 03: U Lat ka Jylla u CH Vijayashankar ha ka sngi Baar ula leit jngoh ïa ka shnong Mawphlang bad ïa ka Lawkyntang da ka jingkhot sngewbha jong ka Khasi Hills Autonomous District Council (KHADC).
La synran ïa u Lat da u Chief Executive Member jong ka Khasi Hills Autonomous District Council (KHADC) u Bah Pynïaid Sing Syiem, u Deputy CEM Bah PN Syiem, u MDC/MLA Bah Charles Marngar bad u Lyngdoh jong ka Hima Mawphlang Bah CA Lyngdoh.
U Lat u la ïohlad ban ïakren ruh bad ki nongshong shnong bad ïa ki kynhun ïatreilang jong ki kynthei ha kaba u la ai jingïaroh ïa ka jingsumar sukher jong ki paidbah ïa ki sawdong sawkun ka mariang ha Meghalaya.
Haba kren ha kane ka sngi u Lat u la ïaroh ïa ki riewlum bad ïa ki dorbar shnong jong ka jaidbynriew Khasi, da kaba ong ba ki dei shisha ki riewieid mariang kiba hikai ïa ka pyrthei ïa ka jingkordor ka mariang. U la ïathuh ruh ïa ka rukom synshar shnong ha ka shnong jong u bad ha Meghalaya, da kaba ong, “ka bneng ha pyrthei,” namarba ka Meghalaya ka long shisha kaba riewspah ha ka lariti bad ka jingpynneh pynsah ïa ki khlaw ki btap bad ïa ka mariang.
U Lat ula pynkynmaw ruh ïa ki bynta bakongsan kiba ïadei bad ka jingpynneh pynsah ïa ki khlaw ki bthap, da kaba banjur ba ka khlaw kam dei tang ka iingsah jong ki jingthaw kiba im hynrei ka dei ruh kaba pynpaw shynna ïa ka jingieid ki briew ïa ka mariang bad ka jingpynmih ïa ki kynbat dawai.
“Ka Meghalaya ka dei ka shlem ba pynmih ïa ki dawai kynbat,” u la ong bad kyntu ïa ki shnong ki thaw ban ïai pynneh pynsah ïa kine ki spahbah ba la ai ei da ka mei mariang.
U Lat u la ïaroh ruh ïa ka jingai jait kmie ha Meghalaya, ha kaba ki kynthei ki don ïa ka bynta kaba kongsan ban pynneh ïa ka jingïatylli ha ka imlang sahlang bad ban pynïoh pateng ïa ki riti dustur.
U la khot bad wer ïa ki samla ban bat ïa ki jinglong tynrai ba la ai da ki longshwa manshwa, da kaba ban jur ba kane ka dei ka lynti ban tei ïa ka imlang sahlang kaba kham bha. U la ban jur ïa ar tylli ki bynta ba kongsan na ka bynta ka roi ka par jong ka jylla, kata, ka pule puthi bad ka jingkyntiew ïa ki karkhana Cottage bad Agro-based Industries. “Ka jingnang jingstad ka dei ban long kaba lah ban ïoh da baroh bad ngi dei ban pynthikna ïa ka jingroi jong ki karkhana rit bad ki karkhana rep, kiba long kiba kongsan na ka bynta ka jingpynkupbor ïa ka ïoh ka kot jong ki shnong ki thaw jong ngi,” u la ong.
Haba pynkut, u Lat u la pynthikna ïa ki paidbah ka jylla Meghalaya ïa ka jingkyrshan ba pura jong u, da kaba ong, “kano kano ka jingïatreilang kaba phi pan na ka Raj Bhavan, ngin don ryngkat bad phi.”
U Lat u la leit ruh ban jngoh ruh ïa ka Inspection Bungalow (IB) jong ka Public Health and Engineering bad ïa kynduh ïa ki ophisar jong ka tnad PHE ha kaba la pyntip ïa u halor ka skhim sam um jong ka Greater Shillong Water Supply Scheme bad nalor kata, la ïakren shuh shuh ïa ki lad ki lynti ban pynjanai ïa ka jingsam um ha ka jylla.
