Shillong, Naitung 12: U nongïalam jong ka Liang Pyrshah u Bah Ronnie V Lyngdoh ha sngi Thohdieng u la ong ba ka long kaba thamula ba ka Voice of the People Party (VPP), kaba la rai ban ïakhun ïa ka elekshon MDC ka ban salong shen hynrei dei kane kajuh ka party kaba kwah pynduh noh ïa ka Sixth Schedule da kaba dawa ban wanrah bujli ia ka Article 371 jong ka riti synshar ka ri India.
“Ka party kaba kwah ban pynduh noh ïa ka Sixth Schedule, mynta kane kajuh ka party ka kwah ban ïakhun ïa ki elekshon jong ki Autonomous District Council. Kane ka long kaba thamula bad ngim lah ban sngewthuh ïa ka jingpyrkhat kaba shalyndet jong kane,” ong u Bah Ronnie.
U Bah Ronnie uba dei ruh u MLA jong ka Mylliem Constituency ha ka jingiakren bad ki lad pathai khubor u la ong, “ka Khyrnit Bahynriew ka dei kaba kongsan namarba ka ai bor ïa ki ADC ban thaw aiñ hynrei lada la pynbujli noh da ka Article 371 la thikna ba sa shah sliah noh ïa ka bor bad ngin ym lah shuh ban thaw aiñ.’
U la ong ba ka Meghalaya ka la lait na ka jingpyntreikam ïa ka Panchayati Raj namarba ka hap hapoh ka Sixth Schedule.
“Lada ka wan ka Article 371, hato kan treikam ka Panchayati Raj neem ha Meghalaya? Kane kadei ka jingkylli kaba ngi kylli,” u la ong.
“Haba ngi la lait na ka Panchayati Raj halor ka nongrim ba ngi dei ka jylla ki riewlum, kumta lada kam don shuh ka Sixth Schedule, kan sa lah ban treikam da ka Panchayati Raj. Kaei ka jingma kaba ap ïa ngi? Kata ka mut ba ki kam synshar shnong kin ym ïoh shuh ki jingithuh da ka Riti Synshar ka ri India. Lada ka Panchayati Raj ka wan, ka sa donkam ban pynlong ïa ki elekshon. Kane ruh ka mut ba ki briew na kiwei ki jaitbynriew ki sa lah ban ïashim bynta ha ki kam pynïaid bad synshar shnong,” u la ong.
