Babu Kular Khongjirem
Ka la kylla long ka raibi ba manla ka por ba kane ka sorkar MDA I&II ba la ïalam da ka party NPP, UDP, bad kiwei .ka la ju mlien bha ban pynjlan shi pynjlan ïa ka samoi treikam jong ki Autonomous District Council (ADC) la ka dei ha Khasi Hills ne Garo Hills ruh kumjuh hi.
Ka jingpynjlan jong ki ka don la ka jong ka jingthmu sha lyndet ïa kaba ki paidbah ba lui lui bapli kim da tip ne shemphang eh namar ki nang ban pynksan nia da kumne da kumtai.
Ka jingthmu ba kongsan eh jong kino kino ki political party kiba bat ïa ka jingsynshar ha ka ri, ka State ne Autonomous Body ka long beit na ka bynta ka jingïoh nong politic jong ki. Lada ki sngewthuh ba ka don jingma ïa ki, kata, kin pyrshang ban thaw lad thaw lynti ban kiar katba lah na kata. Lada ki sngewthuh pat ka ban ïohnong politik ïa ki, wut wut kin leh khlem pynslem wat tang khyndiat ruh.
Kajuh ka jingleh jong ka party NPP ïa ka GHADC ba ka la rai pynjlan sa 6 bnai watla ka ladep pynbna ïa ka elekshon ha ka 10-04-2026 bad ka la sdang sa ka jingthep kyrteng hynrei ka la pynsahngeh jubor na ka daw jong ka jingbthei ka jingïakhih paidbah ha West Garo Hills District.
Ka party NPP kaba bat ïa u lakam synshar ha baroh ar tylli ki bor (GHADC & State Govt.) ka la sngewthuh lypa ba ka la duh jingshaniah ha ki paidbah Garo, kumta, lada pynlong la ka pynlong ki lah ban rem kput bad duh noh ïa ka bor synshar. Ym tang katta, hynrei kan long ruh ka jingjah burom hakhmat ka pyrthei ba ka party ba ïoh ban synshar kan rem kput ha ka elekshon. Ym dei eh tang kata, hynrei ka dei ka rukom pyrkhat jong ka party NPP ba lada ki sngewthuh ba kine ki MDC jong ka kiba myntra ki lah ban rem noh ha ka elekshon ba kin ïaleh, kata, ka ju pynjlan por shuh ïa ki sa 6 bnai khnang ba kin dang ïoh tulop bad ïoh jingmyntoi shuh sa 6 bnai na ka pisa ki paidbah.
Ha KHADC ruh ki leh kumta ha ka por ba long CEM u Bah Pynïaid Sing Syiem. Ha Garo Hills lei jan manla ka san snem ba ki pynjlan. Kiwei kiwei ki party kiba bat ïa ki bor synshar mynshwa ki kham kiar ban leh kumta namar ki burom ïa ka hok ki paidbah shisien san snem lait noh sa tang ba mih ki kynrum kynram ba ki phah shimti da u Administrator. Lada ki leh pyrshah ïa ka mon bad ka hok u paidbah, i kumba ki da kmen, ki da sngewmeng bad sngewsarong pynban. Ki kular da ki nia thiang nia bang, tangba hadien te kin sa rai pynsahngeh noh kha ma kha.
Kane kam jia tang ïa ka elekshon sha GHADC hynrei ki sngewsarong bad sngewkhyllew ruh ba ki la ïoh pynsangeh noh ïa ka surok Fly-Over na Umshyrpi sha Barik kaba ki paidbah ki da angnud shisha ban kham lait na ka dheng kali. Yn nai ïakren ïa ka kam khappud, ka ILP, ka ktien Khasi ha ka 8th Schedule nalor bun kiwei pat ki mat ba kongsan bad ba donkam ka jaitbynriew jong ngi.
Ka Elekshon MP kam jngai shuh ba u paidbah un ai jingsneng biang sa shisien ïa kane ka party. Lada phi mlien ban thok bad shukor ïa u paidbah, u paidbah ruh khlem artatien un kham stad shuh shuh ban thok bad shukor lem na ka bynta jong phi.
