Shillong, Lber, 21: U President jong ka Meghalaya Pradesh Congress Committee (MPCC) Bah Vincent H. Pala u la kynthoh tyngeh halor ka jingkren jong u President ka Voice of the People Party (VPP) Bah Ardent M. Basaiawmoit ha kawei na ki jingialang ba ki Tymmen Basan ki donkti ban sam kiad.
“Ka Voice of the People Party (VPP) ka shu ong ba ki Pastor kiba sam kiad bad kata ka lah ban wanrah ia ka jingsngew jong ka Balang baroh kawei hynrei ha ka jingshisha ka dei ban ong, ‘uei uta u Pastor, uei uta u Tymmen Basan uba leh, khnang ba ka Balang kan dup lah ban leh eiei ia uno uno uba leh. Ban shu ong u Tymmen Basan u sam kiad ka pyni ba baroh ka Balang ka sam kiad bad kam iahap,” la ong u Bah Vincent Pala ha ka jingiakren bad ki lad pathai khubor ha ka sngi Palei.
“Ka VPP lada ka shlur ka dei ban ong uei uta uba leh khnang ba ma ngi ruh ngin don ka jingsngew shaniah hynrei ban shu ong u ong uta, u ong uta, ka long kamkai ki nongkren bad ka pyni ia ka sainpyrkhat jong ki,” la kynthoh u Bah Pala.
“Ka sainpyrkhat jong ka BJP ka long ban kynnoh ia kiwei ki party bad dei tang ka BJP kaba hok. Ka Sainpyrkhat jong ka VPP ruh kajuh hi, tang (ma) ki bahok, baroh kiba tuh suda na kata ka daw kam iahap satia ha kane ka imlang ka sahlang jong ngi. Ki dei ban iathuh mano ba leh khnang ba ngin sngewthuh ba ka jingkren jong ki ka long kaba dei. Hynrei ban shu ong ma nga u bahok, utei uba tuh dei ban da batai,” la ong shuh shuh u Bah Pala.
“Ngi sngewtynnat haba mih ki party kiba thymmai ba ki paidbah kin ioh jied hynrei mar ia mih la sdang noh ban kynnoh bad ngi sngewthuh lada tlot ka Balang bad ka imlang ka sahlang kan ym ktah tang hangne hapoh Meghalaya bad kan ktah ia baroh kawei ka ri India,” ong u Bah Pala
Haba kynthoh ia ka BJP, u Bah Pala u la ong, “nga la ioh ia ki jingthoh ki breiw ki la sdang ban kren pyrshah ia ki Balang bapher bapher. Kane baroh ka dei ka saiñdur jong ka BJP ba ka la suhbuit naduh mynshwa ban kren pyrshah ia kiwei ki party, dei ban kren pyrshah ruh ia ki Balang bad ban kren pyrshah ruh wat ia ki nongialam Balang khnang ba ki briew kin duh jingshaniah bad ka imlang ka sahlang kan tlot bad kan tlot noh ka jaidbynriew. Kin ai sa u drok, kin ai sa ka kiad. Yn iohnong ki shimet ki armet, kan duhnong pat ka imlang ka sashlang. Kata ka dei ka jingma kaba ngi don kumba ka long mynta.”
