Ka seng Congress mynta ka don ha ka khim khait bad kam don pisa shuh ban leit ialap elekshon sha kylleng ka Ri hadien ba ka Income Tax Department ka la kurup ia ka Bank Account bad ka Party Fund jong ka.
Ki nongialam jong ka seng Congress ba kynthup ia u President Rangbah u Mallikarjun Kharge, ka Sonia Gandhi , u Rahul Gandhi bad u Treasurer u Ajay Maken ki la kren sha ki lad pathai khubor ha nongbah Delhi ban pynrem ia kane ka jingleh ka sorkar ba ialam da ka BJP bad ki la kynnoh ba ka BJP ka pyndonkam bakla ia ka Income Tax Department.
Haba kren sha ki lad pathai khubor, u Rahul Gandhi u la ong ba mynta ka seng Congress kam don pisa shuh tang ban thied tiket ban shong rel ruh na ka bynta ki nongialam jong ka kiba leit ban ialap elekshon. U Rahul u la kynnoh ba ka jingleh jong ka sorkar ka dei beit ban khanglad ia ka seng Congress khnang ba kan ym ioh ban ialap elekshon.
U Mallikarjun Kharge pat u la ong ba kane ka sorkar ba ialam da ka BJP ka la teh na kti ka kjat jong ka seng Congress khnang ba kan ym lah khih shuh. U Treasurer u Ajay Maken u la ong ba ka don 285 klur tyngka ka pisa jong ka seng Congress hapoh Account ia kaba kam lah shuh mynta ban pyndonkam, kan ym lah shuh ban pyndonkam na ka bynta ka Advertisement ne sha ki kam ialap elekshon.
Ka Account jong ka seng Congress ka la shah kurup ha ka Income Tax dei hadien ba ka seng Congress kam shym la lah ban pynbiang ia ka jingkhein jong u snem 2018-2019, ia kaba ki seng sainpyrthei ki hap ban ai jingkhein sha ka Income Tax manla u snem.
