Shillong, Nailar, 13: Ka jingdawa ban pynïoh ïa ka hok jong u (L) Bah Chesterfield Thangkhiew ka dang ïai sawa haduh kine ki sngi, kata, hadien lai snem ba u la shah siat ïap ha ki Pulit kiba la leit khynra ïa ka ingsah jong u ha ka miet shiteng synñia jong ka 13 tarik, Nailar, 2021 ha Mawlai Kynton Massar, Shillong.
Ki lai tylli ki kynhun sengbhalang kiba don ha ka jylli jong ka shnong Mawlai kiba kynthup ïa ka KSU, FKJGP bad HNYF Mawlai Circle ha ka sngi Baar ki la teh da ki lama iong ha ka thaiñ Mawlai ban pynrem jur ïa ka sorkar bad ban dawa ïa ka hok jong u Bah Cherish.
Ïa ki lama iong bad ïa ki banner ki dkhot sengbhalang ki la teh naduh Pertol Pump ter ter shaduh Stand Bus bad ha ki thuk thuk ar shaka.
Ha ki banner, ki sengbhalang ki la thoh, “ka snam u Khasi kam shongdor hakhmat ka sorkar,” “Be careful when you’re sleeping, you might be shot by the Government,” “ u kuli sorkar u treikam tyngeh tang na bynta kiba dawa ïa ka hok u Khasi,” “ngin ïai pyrto ïa phi Bah Cheris,” “ki nongleh kam sniew ki dei ban ïoh ka jingpynsajia,” bad kiwei kiwei.
Ha ka thaiñ Nongthymmai, ki dkhot jong ka FKJGP Shillong City ki la teh ïa ki lama iong bad ïa ki banner ha Fire Brigade bad ha Nongthymmai.
Ha kane kajuh ka sngi, ki dkhot jong ka KSU ki la teh ïa ki banner bad ïa ki lama iong naduh Motphran ter ter sha Khyndai Lad bad ha ka thaiñ Laitumkhrah.
Ki dkhot jong ki lai tylli ki sengbhalang ryngkat bad ki paidbah ka shnong Mawlai bad ka Bri u Hynñiewtrep ki la synran ruh ïa ka ing ka sem ha ka jingleit buh syntiew ha u lum jingtep jong u Bah Cherish ha Lawmali ha ka sngi Baar.
