Shillong, Nohprah, 11: Ka Khasi Students Union, kaba long kawei na ki kynhun kaba iatreilang bad ka North East Students Organisation ha ka 11 tarik u Nohprah, 2023 ka la teh da ki lama iong bad ki Banner ha kylleng ki bynta jong ka Sor Shillong ban pynpaw ia ka jingpyrshah halor ka jingbym sngap jong ka Sorkar India ia ka sur jong ki riewlum ritpaid jong ki jylla ka thain Shatei Lammihngi da kaba mynjur ia ka Ain ïakjakor kaba la tip kum ka Citizenship Amendment Act, 2019.
Ha kawei na ki Banner kiba ka KSU ka la teh, ka la thoh ia kine ki kyntien kiba ong, “11 tarik, Nohprah, 2019, haba ka CAB ka la kylla long ka CAA. Ka sngi badum na ka bynta ki paid riewlum jong ka thain Shatei Lammihngi bad ka sngi bakmen na ka bynta ki mynder ri poiwir.”
Ka KSU, ka la dawa ia ka Sorkar ban thwet, ban pyndam bad ban pynphai biang ia baroh ki mynder ri poiwir kiba wan rung hashwa jong u snem 1971, hynrei ym ban ai ia ka jaka riehtngen ia ki.
Dang shen, u Chairman jong ka NESO u Bah Samuel B. Jyrwa u la ong ba ka NESO ka kwah ban pynkynmaw biang ïa ki paidbah jong ka thaiñ Shatei Lammihngi baroh kawei ba ha ka 11 tarik, Nohprah 2019, wat hapdeng ka jingpyrshah kaba jur jong ki riewlum ritpaid ka thaiñ Shatei Lammihngi ïa ka Citizenship (Amendment) Bill 2019, ka Sorkar India kam shym la shah skhor satia bad khatduh ïawai lyngba ka Rajya Sabha la mynjur ïa kane ka Aiñ Ïakjakor kaba la tip kum ka Citizenship (Amendment) Act 2019.
“Kane ka jingpynbna ka long ban phah ïa u kyrwoh sha ka Sorkar India ba ngi pyrshah ïa ka Citizenship (Amendment) Act 2019 bad ha kajuh ka por ban pynkynmaw ïa ki paidbah bad ïa ki jingshah leh bym hok ba ka Sorkar India ka la leh pyrshah ïa ka mon jong ki paid riewlum ka thaiñ Shatei Lammihngi,” u la ong.
