Shillong, Nohprah, 11: Ka Meghalaya Chess Association ha ryngkat ka jingiatreilang bad ka All India Chess Federation ka la pynlong ia ka Seminar kaba lai sngi, kata naduh ka 8-10 tarik, Nohprah kaba long ruh shi bynta ban ai jinghikai ia ki nongiashim bynta shwa ban pynsdang ia ka lympung ialehkai Chess kaba la tip kum ka 1st Meghalaya International Open Grand Master Chess Tournament ha SAI, STC Indoor Sports Stadium ha NEHU ka ban sdang naduh ka 12 tarik, u Nohprah 2023 bad ia kaba yn sa pynkut ha ka 20 tarik u Nohprah, 2023.
U President jong ka Association u Bah Khizar Meheraj Warjri ha ka jingiakren bad ka Batesi Tv u la iathuh ba ha kane ka lympung ialehkai Chess yn ailad ban iashim bynta naduh ki khynnah kiba la kynjoh ia ka rta kaba 10 snem shaneng haduh ki rangbah kiba la kham iaw ka rta ha kaba yn sa phiah la ki jong ki jong ki kyrdan na ka bynta ki shynrang bad ki kynthei.
U la iathuh ba kin sa don ruh ki nongiashim bynta kum ki Grand Master nabar ka jylla, kata, na ki jylla jong ka thain Shatei Lammihngi, na ki jylla jong ka dewbah India bad na shabar jong ka ri India, kata, na ka ri USA, Vietnam, Pakistan, Bangladesh, Sri Lanka, Egypt, Zambia, Thailand bad kiwei kiwei.
U la iathuh ba ka khusnam na ka bynta ki lahduh ha ka Grand Master ka long 30 lak bad na ka bynta ki nongiashim bynta kiba na kane ka jylla bad na ki jylla ka thaiñ Shatei Lammihngi la phiah la ka jong ka khusnam, na ka bynta ki kyrdan katkum ki rta bapher bapher jong ki nongiashim bynta.
