Shillong, Risaw, 23: Ka Khasi Jaiñtia Christian Leaders Forum (KJCLF) ka pynshai ba ka Forum kam don ka jingpyrshah ïa ka jingpynlong ïa ka tamasa Shillong Cherry Blossom da ka Sorkar Jylla, hynrei ka Forum ka kwah ban pynskhem bad kren shai ba ka sngi U Blei ka long ka sngi ka Bakhuid bad kyntang na ka bynta ki riewngeit Khristan bad ki Balang.
Ha u kyrwoh ba la phah da u Secretary jong ka Forum u Rev. Dr. EH Kharkongor, u la ong ba ka Forum ka khmihlynti ba kine ki tamasa kin ïaid beit ïaid ryntih khlem don kano kano ka jingpynwit bad ka jingpynthut, khnang ba kane kan long ruh kaba kyntiew ïa ka jingshongsuk shongshngaiñ ha ka Jylla.
Kum ban shu pynkynmaw hangne ka JAC ka kynthup ïa ki seng na Ri-bhoi District, kata, ka Meghalaya People United Front (MPUF), Ri-Bhoi Youth Organization (RBYO), United Hynniewtrep Movement (UHM), Saiñdur Tipkur Tipkha Ïeng Ehrngiew u Hynñiewtrep (STIEH) bad ka Meghalaya People’s Social Organization (MPSO) ki la dawa ïa ka tnat Jngohkai Pyrthei jong ka Sorkar Jylla ba kan pynkynriah noh mardor ïa ka sngi ban pynkut ïa ka tamasa Shillong Cherry Blossom kata, ha ka 19 tarik, Naiwieng, 2023 kaba hap ha ka sngi u Blei, ka ban sa long ha madan Kurkalang, Bhoirymbong, Ribhoi District.
Kine ki kynhun ki la maham ruh lada ka tnat Jngohkai Pyrthei kam sngap ïa kane ka jingdawa, ki dkhot jong kine ki kynhun kin rah da ki plakad bad lada ka mih kano kano ka jingkulmar ka Sorkar hi ka hap ban shim ïa ka jingkitkhlieh.
U Myntri ka tnat Jngohkai Pyrthei Bah Paul Lyngdoh haba pynphai nia halor kane ka jingpyrshah jong kine ki kynhun u la ong, ‘baroh ki sngi ki dei ki sngi kiba Khuid,’ bad ong ruh ba ka Sorkar kam shym la pynbor ïa ki paidbah ne ïano ïano ban leit sha kane ka tamasa.
