Shillong, Nailur 12: U Myntri Rangbah ka jylla u Conrad K Sangma ha ka sngi Thohdieng u la pynthikna ba ka sorkar kam don jingthmu ban pynïaid hi ïa baroh ki skul deficit ne ban pynduh ïa ki grant-in-aid ban kyrshan ïa ki kumba ki ju ïohpdiang.
Katkum ka jingong jong u, ka jingtyrwa ïa ka Meghalaya Education Grant (MEG) ka dei dang dei hapoh ka jingïasyllok bad ka sorkar ka pdiang ïa ki jingai jingmut khnang ban pynlong ïa ka jingtreikam kaba kham bha shuh shuh.
“Ka jingthmu jong ka sorkar dei ban ym pynthut ïano ïano. Ngi kwah ba kane kan ïaibteng hynrei kiba bun ki skul bad ki jingdawa bapher bapher ki ïai wan sha ngi. Namar kata ka long kaba eh bha ïa ngi ban wanrah kawei ka rai ban pynbiang ïa baroh. Katto katne ki skul ki kwah ban shimti ka sorkar bad ki la thoh sha ngi hynrei ha kawei ka liang katto katne ki skul ki kwah ïa ka deficit partern ban bteng. Ngi la shong shai ha baroh ki mat kiba don hakhmat jong ngi naba ngi ngeit ha ki jingïakren, ki jingïasyllok bad kane kaba ngi leh mynta,” ong u Sangma haba jubab ïa ka jingkylli bynrap u MLA ka VPP na Nongkrem u Bah Ardent Basaiawmoit.
“Ngim don jingthmu ban leh da ka bor bad shimti ïa baroh ki skul ne ban pynsangeh ïa ki rukom pynïaid deficit. Hynrei naba ki jingdawa ki la wan sha ngi ka dei ka kamram ka sorkar ban bishar bad ban khmih bad dei ha kane ka nongrim ka jingïasyllok halor ka MEG ka la jia,” u la ong.
“Ka MEG kam dei kaba ngi la pyntreikam, ngi thaw bad ngi dang syllok bad kam don ka jingkylli ban leh da ka bor,” bynrap u Sangma.
Halor ki jingpyrshang ka sorkar ban pynbha ïa ki jingtei ki skul sorkar bad ki college, u Myntri Rangbah u la ong ba ki la don palat 2500 ki skul kiba la jot bad la jan T. 1000 klur la pynlut haduh mynta ban pynbha bad tang 500 tylli ki skul ba ieh khlem pat pyndep.
U la pynbna ba ka sorkar ka pyrkhat ban bteng ka jingkyrshan sha ki skul ba ïoh jingïarap na ka sorkar ba kynthup ïa ki deficit bad skul ad-hoc, haba ïadei bad ki lad jingtei.
U Myntri Rangbah u la ong ban kyntiew ïa ki grant sha ki skul ad-hoc bad deficit kan ktah ïa ka jinglut kaba donkam kumba T. 200-300 klur.
“Kumba long mynta ka jingmang pisa kaba malu mala ka sorkar jylla ka pynlut jan T. 600 klur ha ki tulop jong ki skul ka sorkar ba kynthup ïa ki lower primary, upper primary, secondary, higher secondary bad college. Ka lah ban kiew khyndiat ha ki bnai ba la dep. Hynrei ka sorkar ka pynlut palat T. 1100 klur ban pynlait ïa ki Grant in Aid sha ki jaka pule shimet kiba ïarap da ka sorkar kynthup ïa ki SSA, deficit bad skul adhoc manla u snem. Ngi la ïoh ka jingshah ktah ha ka pla tyngka halor ki jingpynlut ba bynrap kaba long duna ïa ka T. 200-300 klur. Kadei ka rai kaba khraw ba la shim ha shwa ban ïaid shakhmat,” u la ong.
Halor ka mat ban ot ïa ka tulop ki nonghikai, u Myntri Rangbah u la pynthikna ba ka tnat Pule puthi ka dang pynbeit ïa kane.
Kham ha shwa ha ka jubab, u Myntri ka tnat Pule puthi u Rakkam A Sangma u la pynthikna ba ka sorkar kan ym pynsangeh ban siew tulop ïa ki skul deficit.
U la ïathuh ba ki don kumba 3361 tylli ki skul lower primary, 881 tylli ki skul upper primary, 2363 tylli ki skul secondary, bad 186 tylli ki skul higher secondary kiba hapoh ka deficit system.
U la ong ba ka sorkar ka kyrshan ïa ka tulop jong kine ki skul katba ki School Management Committee (SMCs) ki hap kitkhlieh ïa kiwei pat ki jingpynlut.
U la ïathuh ba mynshwa ki SMC ki donkam ka jingmynjur na ka tnat Pule ban thung ïa ki nonghikai ha ki skul deficit.
“Hynrei kane ka hukum la pynkylla bad ki SMC mynta ki don ka bor ban ïaid shakhmat ha ki jingthung kam da kaba bud ïa ka roster system,” u la ong.
U la ong ruh ba ka sorkar ka dang bishar ïa ki lynti ban pynbha ïa kiwei pat ki skul ki bym leh bha bad kumjuh ka jingpynkynriah ïa ki nonghikai SSA sha ki skul sorkar ban pynbeit ïa ka jingduna ki nonghikai.
