Shillong, Jylliew 07: Ka Telecom Regulatory Authority of India (TRAI) ka la ïoh jingtip ba ki don ki riewshim kabu da kaba phah ïa ki jingpyntip lyngba ka WhatsApp, ki SMS, da kaba phone sha ki riew paidbah ba kam ïalade ba ki dei ki nongtrei jong ka TRAI da kaba shna thok ïa ki kot ki sla jong ka ophis.
Ha kaba ïadei bad kane na ka liang jong ka TRAI ka pynshai ba kine ki jingleh baroh ki long beaiñ namar kiba phone ne kiba phah ïa ki jingthoh ki da ong ba ïa ka numbar jong ki lah ban shah pynduh noh bad la ong ba lada kim jubab ïa ka mobile number jong ki kin kut noh da kaba bthah ruh ba kin buh ha ki mobile jong ki ïa ki website kiba sniew.
Halor kane ka TRAI ka pynshai paidbah bad ong ba kam ju phone ne ong ïano ïano ruh ban ong ba kin pynduh ïa ka mobile number jong ki, ne ban phah kano kano ka jingpyntip, na ka liang jong ka TRAI ka khlem aibor ïano ïano ruh ba kin phone sha ki nongpyndonkam mobile ïa kum kine ki jaitkam.
Kumta, lada don kano kano ka jingphone lada don kiba kam ba kidei na ka TRAI ban byrngem ban ot ïa ka mobile number, ïa kane dei ban shim ba ka dei ka jingleh ban thok ban shukor ïa ki riew paidbah da ki riewshim kabu.
Ban ïada na kane ka jingshah shim kabu jong ki riew sniew ïa ki paidbah, la bthah ïa ki paidbah nongshong shnong ba kin ujor sha ka “cybercrime” bad la bthah ïa ki paidbah ruh ba kin ujor sha ka tnad phah jingtip jong ka Department jong ka Telecommunication’ Sanchar Saathi platform.
Ïa kane ka jaka ban ujor lah ban leit sha ka https://sancharsaathi.gov.in/
