DON JINGIADEI NE EM KA NLCN BAD U JOANNES LAMARE UBA SHAH KEM HA U SNEM 2021 HADIEN BA WANPHAI NA NAGALAND : DIG
Shillong, Nailar, 18: Saw ngut ki dkhot jong ka seng kieng atiar ba thymmai ka ‘National Liberation Council of Nongkyndong (NLCN)’ ba la shah kem na rilum Jaiñtia la wanrah sha nongbah Shillong ha ka sngi thohdieng bad la tian bishar ïa ki ha Kashari.
Haduh mynta ki Pulit ki dang pynjur ïa ka jingkhynra ha kylleng ka rilum Khasi bad Jaiñtia ban ïohkem lut ïa ki dkhot jong kane ka kynhun.
U Deputy Inspector General of Police (Eastern Range) u Davis NR Marak u la ong ba kam shym la don shuh kano kano ka jingïohkem ïa ki dkhot kane ka kynhun haduh mynta.
“Dei tang kine ki saw ngut kiba la ïohkem na Jowai, la wanrah bad la tian bishar ha Kashari mynta ka sngi,” u la ong.
Ka Kashari ka la aibor ban set ha along ki Pulit na ka bynta shiphew sngi. Haduh mynta, ki don baroh 11 ngut ki nongïalam bad ki dkhot jong ka NLCN kiba la shah kem. U Marak u la ïathuh, ïa kine kiba la ïohkem la wanrah sha Shillong na ka bynta ban pynlong shuh shuh ïa ka jingtohkit kaba bniah.
Arngut bad kynthup ruh ïa kawei ka kynthei bad uwei u dkhot ba la wanrah na Jowai sha Shillong mynta ka sngi ki la kem pang bad poi sha Hospital.
U DIG u la ïathuh ba kane ka kynthei ka la kam ba ka la armet mynta la lai bnai hynrei ynda la leh test la lap ba kam shym la long satia kumta. Namarkata, ki doktor ki la hap ban bat shwa ïa ka ha Hospital na ka bynta ban khmih bniah.
Shuh shuh u DIG u la ïathuh ba ka jingthwet haduh mynta ka dang ïaid shakhmat ban ïohkem ïa kiwei pat ki dkhot. “Ngi dang khmihlynti ban ïohkem shuh shuh sa katto katne ngut ha ki sngi ki ban sa wan bad kata kan jia tang hadien ba ngi la lah ban tohkit bniah ïa kine kiba la shahkem,” ong u DIG.
U la ïathuh ba u Investigating Officer bad ka kynhun ki dang bunkam ban rah sha Hospital ban leh ïa ka medical checkup bad ban tian bishar ïa kine kiba la ïohkem ha Kashari..
“Ïa mynta hi ka jingtohkit kaba janai kam pat sdang satia,” u la bynrap.
U DIG u la ong ba ka tnat Pulit jong ka Jylla ka dang pyrshang ban wad bniah la ka NLCN ka don jingïadei neem bad kano kano ka kynhun kieng atiar na ka jylla Nagaland.
“Ngam pat lah ban ong la kan dei ka NSCN. Ki (NLCN) la ïakren bad ki katto katne ngut ki dkhot (ha Nagaland) hynrei na kano ka kynhun, ïa kata ngin dang hap ban tih bniah. Ngin sa pyrshang ban wad bniah kano ka kynhun kaba dei shisha namarba ka NSCN ka don bynta ki kynhun bad ngin hap ban wad bniah la ka dei ka NSCN lane kiwei kiwei pat ki kynhun bad ïa kata ngin dang hap ban tih bniah bin pa bin,” u la ong.
Shuh shuh, u DIG u la ïathuh ba ka tnat Pulit kan pynlong ïa ka jingtohkit kaba bniah la kane ka kynhun kieng atiar ba thymmai ka don jingïadei ne em bad u Bah Joannes Lamare uba dei u nongtrei mon sngewbha uba la shah kem ha u snem 2021, halor ka jingkynnoh ba la pan jingïarap na ka NSCN-IM ban thaw ïa ka seng kieng atiar kaba thymmai ha Meghalaya.
Ïa u Bah Lamare ki Pulit ki la kem katba u dang wan phai na Hebron Camp jong ka NSCN kaba don ha Dimapur.
“Ïa mynta, ngim pat lah ba ong, la u don jingkti ne um don kti eiei. Ngim pat lap sabut hynrei ha ka jingtohkit lada ngi ïoh ksai ngin sa tih bniah ïa kane ruh ka bynta. Ngi la buh jingmut bha ïa kane ka bynta namarba u (Bah Lamare) la shah kem hadien ba la wan phai na ka jylla Nagaland,” la ong u DIG.
Ha kajuh ka por, ka tnat Pulit jong ka Jylla ka la pyntip ruh ïa ka jingmih pyrthei ka NLCN sha ka Ministry of Home Affairs (MHA).
“Haoid, ngi la pyntip sha ka MHA namarba ha kano kano ka por haba ngi register case hapoh ka Unlawful Activities Prevention Act, ngi hap ban pyntip sha ka MHA hapoh shi bnai,” la ïathuh u DIG
Ha ka sngi Balang mynta ka taiew, hynñiew ngut ki dkhot jong ka (NLCN) bad kynthup ïa uwei u khynnah skul uba dang 16 snem ka rta ki la shah kem ha ki Pulit jong ka Jylla.
Ki Pulit ki la ïoh jingtip kaba bniah na ki tnat syntiat ba ka NLCN ka la ïatreilang bad kiwei pat ki kynhun kieng atiar na ka jylla Nagaland bad la thmu ruh ban phah pyntbit ïa ka kynhun ba nyngkong eh sha ka Jylla Nagaland ha ka 17 tarik, Nailar, 2023.
Lyngba kane ka jingtip ba bniah, ka tnat Pulit ka la pynlong ïa ka jingkhynra kaba jur ha ka step jong ka 16 tarik u Nailar, 2023 bad hynniew ngut ki dkhot ki la ngat ha ka kti jong ki Pulit na ki bynta bapher bapher jong ka Eastern Range ba kynthup ruh ïa uwei u khynnah uba dang hapoh 18 snem ka rta uba la shah kem na East Khasi Hills District.
Halor kane, ki Pulit ki la rejistar da ka Criminal Case hapoh ka Crime Branch Police Station, Eastern Range, Shillong bad pyngnat ha ki kyndon bapher bapher jong ka Indian Penal Code (IPC) bad hapoh ka Unlawful Activities (Prevention) Act.
Kine kiba la shah kem ki kynthup ïa u Self Styled Chairman, u Commander in Chief, u General Secretary bad ki Area Commander jong ka West Khasi Hills, ka Jaiñtia Hills, ïa ki nongpynrung dkhot, ïa u nongbuh jingtip jong kane ka kynhun bad sa lai ngut kiwei pat ki dkhot jong kane kynhun.
Ha ka jingtohkit kaba bniah ban lap dien ïa ki jaka riehtngen jong ki dkhot kane ka kynhun, ki Pulit ki la ïoh kurup ruh ïa ki tiar ba donkam ba kynthup ruh ïa ki mobile phone bad kiwei kiwei ki kot ki sla.
