Shillong, Nailar, 18: Shwa ba ki ar tylli ki Regional Commmittee jong ka Sorkar Meghalaya bad ka Sorkar Assam kin leit sorjamin ia ki jaka kiba don hapdeng ka jingiakajia pud ha ka jingiapynbeit pud jong ka wat kaba ar, ka Boundary Committee jong ka Khasi Hills Autonomous Council (KHADC) ha ka sngi thohdieng ka la lum lang ia baroh ki khlieh nongsynshar jong kine ki jaka kiba don hapdeng ka jingiakajia pud.
Ka jinglum jong ka KHADC ia kine ki Syiem jong ki Hima bad ia ki khlieh nongsynshar Raid ka long ban pynsngewthuh janai ba kin dup pynsngewthuh pat sha ki paidbah jong ki shnong kiba don ha ka jingiakajia pud ba kin pynpaw beit da kawei ka sur kaba shai ba kin iai neh hapoh ka Jylla Meghalaya.
Ki shnong kiba don ha ka jingiakajia pud hapdeng ka Meghalaya bad ka Assam ki long ka shnong Desh Domria kaba hap hapoh ka Hima Mylliem, ka shnong Borduar kaba hap ha ka Hima Nongspung bad hima nongkhlaw, ka shnong Nongwah-Mawtamur kaba hap ha ka Hima Sohiong bad ha ka Hima Jirang, ka shnong Langpih kaba hap hapoh ka Hima Nongmynsaw bad ka Block-II kaba dang hap hapoh u pud u sam ka Raid Nongtung jong ka Hima Khyrim.
U Deputy Chief Executive Member (Dy. CEM) ka Council u Bah Pynshngaiñ N. Syiem ha ka jingiakren bad ki lad pathai khubor hadien ba la wai ka jingialang u la ong ba ka Council ka la kyntu ia ki Syiem bad ia ki nongsynshar jong ki Raid ba kin pynsngewthuh shai ia ki paidbah ba kin dup mih ryntih ha kano kano ka por ba ki nongialam jong ki Regional Committee na ka jylla Meghalaya bad na ka jylla Assam ki leit ban sorjamin bad ban pynpaw paidbah ia ka mon jong ki ban don beit hapoh ka jylla Meghalaya.
