Jowai, Nailar, 16: U Bah Sniawbhalang Dhar uba long Symbud Myntri Rangbah ka Jylla bad u Chairman jong ka Regional Committee na ka bynta ka West Jaintia Hills u la iathuh ba ia ka khyrdop khrong khajna lane ka Entry Tax Gate ba la pynieng da ka Karbi Anglong Autonomous Council la weng noh na ka shnong ha ka 16 tarik u Nailar, 2023.
U Bah Sniawbhalang dhar u la pynbna ia kane ha ka jingleit sorjamin jong ka Regional Committee na ka bynta ka West Jaintia Hills District bad ka Regional Committee na ka bynta ka West Karbi Anglong District ba la ialam da u Pijush Hazarika uba long u Myntri ka sorkar Assam.
Ki nongialam jong ka Regional Commmitee ki pynlong ruh ia ka jingialang bad ki nongialam jong ka Dorbar Shnong Khanduli ha madan ialehkai ha ka shnong Khanduli bad hadien kane, la pynlong pat sa ia ka jingialang bad ki paid Karbi ha Police Border Outpost ka Assam, ha Khanduli.
Ha ka jingialang ki nongialam jong ka Dorbar Shnong Khanduli, ki la aiti ia ka dorkhas halor ki lai tylli ki mat jingdawa, kata ban weng shisyndon ia ka Entry Tax Gate jong ka Karbi Anglong Autonomous Council kaba la pynieng mynta dang kumba saw bnai eiei ha ka shnong Khanduli, ban weng noh ia ki Pulit Assam ha ka jaka ba la buh ia kane ka khyrdop khrong khajana bad ban weng ia ka Police Camp jong ka Jylla Assam na Khanduli.
Hadien kane ka jingialang, ki nongialam jong ka Regional Committee ki la hiar jurip haduh u Zero Point jong ka Khanduli kaba dang hap hapoh u pud jong ka West Jaintia Hills District.
Hadien ka jingjurip ia kine ki ar tylli ki jaka, ki nongialam jong ki Regional Committee ki la pynlong sa ka jingialang bad ki nongmihkhmat na ki jaidbynriew Karbi bad ki nongialam jong ki sengbhalang kiba kynthup ia ka Karbi Students Association, ka Socheng Amreng Border Development Committee, ka Karbi Anglong Autonomous Council bad kiwei kiwei.
