Shillong, Lber, 23: Arngut ki dkhot jong ka Garo National Liberation Council (Regroup) ki la ngat ha ka shrip jong ki Pulit ka East Garo Hills District katba ki dang leit shimti ia ka pisa ba ki la dawa na Rongjeng Reserve Forest ha ka sngi Palei.
Kine ki arngut kiba la shah kem ki dei kiba la tip kyrteng kum u Predikson A. Sangma ba ju khot sin Ara, uba la 32 snem ka rta uba sah ha ka shnong Ambre A’ding, Rongjeng East Garo Hills bad uwei pat u dei uba la tip kyrteng kum u Setbingstar D. Shira ba ju khot sin Negro, uba la 33 snem ka rta uba sah ha ka shnong Nongchram Dekmik, East Garo Hills.
Katkum u kyrwoh ba la phah da u Superintendent of Police ka East Garo Hills Bah S.A Rynjah u la pyntip ba ha ka 18 tarik, Lber, 2024 ki Pulit jong ka Rongjeng Police Station ki la ioh pdiang ia ka ejahar ba la kynnoh ba ki don ki briew kiba la kam ia lade kum ki dkhot ka GNLA (R) ki la telephone ia ki nongujor na u nombar bym lah ban ithuh naduh ka 15 tarik Lber, 2024 ban dawa pisa bad byrngem ruh ba lada kim siew ia ka pisa kin sa ngat ha ka jingeh.
Lyngba kane ka ejahar ba la register ha Rongjeng PS hapoh ka Section 386/34 pule lang bad ka Section 16/184/20 jong ka U.A(P)Act ki la Pulit ki la pynlong ia ka jingtohkit kaba bniah.
Ha ka 21 tarik ki Pulit ki la iohkem shwa ia u Predikson A. Sangma ba ju khot sin Ara katba u dang leit shim ia ka pisa ba la dawa na ki nongujor na Rongjeng Reserve Forest. Ha kajuh ka por ki Pulit kiba la pynlong ia ka jingkhynra, ki la iohkem sa ia u Setbingstar D. Shira ba ju khot sin Negro na Rongjeng Sengma. Ki Pulit ki dang iai bteng ruh ban iohkem sa ia kiwei pat ki dkhot jong kane ka kynhun kiba dang phetrieh na ka kti jong ki Pulit.
U SP u la kyrpad ia ki paidbah ba lada ki ioh pdiang ia kino kino ki jingshah dawa pisa ki dei ban pyntip marmar sha ki thanat bad ia ki nongpyntip yn sa buhrieh noh ia ka kyrteng bad yn sa ai khusnam.
