Shillong, Lber, 23: Ka Organising Secretary jong ka Akhil Bharatiya Vidyarthi Parishad (ABVP) East Khasi Hills District Kong Nibiang Sumer ha ka sngi Saitjaiñ ka la kyntait ba ka ABVP kam don bynta eiei ruh em bad ka jingialum jong ki briew kiba kah durkhmat ba rah bad ki tiar pynmynsaw hajan ka Petrol Pump ha phyllaw ka skulbah North Eastern Hill University (NEHU), Shillong ha ka 21 tarik mynta u bnai.
Kane ka nongialam jong ka ABVP ha ka jingiakren bad u nonglum khubor ka la dawa ruh ia ki nongialam jong ka North Eastern Hill University Students Union (NEHUSU), kata ia u Banpynbiang Riang bad ia u Mandor Diengdoh ban ujor sha ki Pulit lada ki lap shisha ba dei ka ABVP kaba phah ia ki briew kumba 40-50 ngut sha skulbah NEHU.
Kum ban shu pyntip hangne, ha ka miet 21 tarik mynta u bnai ki Pulit SOT bad ka Mawkynroh Out Post ki la hiar sha skulbah NEHU hadien ba ki la ioh jingtip na ki nongialam ka NEHUSU halor ka jingdon jong ki briew kiba kah durkhmat bad kiba rah ia ki tiar pynmynsaw kiba ialum hajan ka Petrol Pump ha NEHU.
Ka khubor ka la saphriang ha Social Media ba ki don kumba 40 ne 50 ngut ki briew ba la kah durkhmat bad kiba rah ia ki tiar ki tar pynmynsaw ki la rung ha skulbah NEHU ban thwet ia u Banpynbiang Riang bad ia u Mandor Diengdoh hadien ba kine ki arngut kiba dei ruh ki nongïalam jong ka Hynñiewtrep Youths Council (HYC) la kynnoh ba ki la pynsangeh ia ka prokram kaba dei halor ka Indian Modern Literacy Language. Ki nongialam ka NEHUSU ki la kam ba ynda la bishar bha ka dei ka Education Cell jong ka RSS.
Ki Pulit kiba la leit sha kane ka skulbah kim shym la lap shuh ia ki briew ba kah durkhmat bad rah tiar pynmynsaw hynrei watla katta ki la peitngor bha ia ka jinglong jingman hapoh kane ka skulbah ban tem ia kino kino ki jingiakynad kiba lah ban mih ha kano kano ka por.
Ka Kong Sumer ka la ong, “ha ka jingiakynduh ia ki nongialam ka NEHUSU kiba dei ruh ki dkhot ka HYC ngi shu kylli ia ki na kaei ka daw ba la pynsangeh ia ka prokram bad ki ong ba ka don jingiadei bad ka RSS. Kane ka prokram kam dei jong kiwei hynrei ka dei ka prokram jong ka Hindi Deparment hynrei ma ki pat ki pynmih ba ka don jingiadei bad ka RSS bad ba ka iadei bad ka niam Hindu. Ngi kwah ban tip balei ki Hindu kim lah seh ban long prokram?”
Ka la kynthoh ruh da kaba ong, “ka jingkren jong u Banpynbiang Riang ha ka YouTube Channel ba la pynmih ha ka Batesi TV ka long thik kumba ong ba dei ma ngi kiba phah. Ngi dei tang ka seng ki samla pule bad haba ngi kwah jingpynshai ngi wan beit ha ka por mynsngi.”
“Lada ki kynnoh ba dei ka ABVP kaba phah ia ki runar ki dei ban ujor sha ki Pulit hynrei ym dei ban shu kren tang ha ki lad pathai khubor. Ma ngi ruh ngi lah ban ai ujor sha ki Pulit. Khot lang ia ki dkhot ka AVBP bad ia ki dkhot HYC ha Police Station bad sa peit ia ki Mobile Phone mano ba telephone ia kito ki runar ban wan ha skulbah,” ka la ong.
Ka la ong ruh ba baroh ki briew ki tip bha ia ka jinglong jingman ha skulbah NEHU ba ym dei tang ha kato ka sngi ba ki don ki briew kiba kah durkhmat bad rah tiar pynmynsaw hynrei wat ha kiwei kiwei ki sngi ruh ka ju jia.
“Tangba balei pat ha kato ka sngi ki (nongialam ka NEHUSU) ai da ka kyrteng jong ka ABVP? Lada ki don eiei pyrshah ki dei ban ujor beit da ka ejahar bad ngi lei ngi long kiba la kloi ban leh ia kata bad kim dei ki briew jong ngi,” la bynrap ka Kong Sumer.
“Lada ki ong ba ka dei ka Secular University (ka skulbah bym iadon bynta eiei bad kano kano ka niam) hynrei balei pat ki pynmih ba dei ka Hindu ngim shah. Na kata ka daw, kito ki briew ki dei kiba sheptieng ia ka niam Hindu. Lada ki kwah ban pyniaid ia ka skulbah jong ki ngin wad ia ki briew jong ngi na ka skulbah ban weng noh bad kin pyniaid noh ma ki hi,” ka la ong.
“Lada ki ong ba ym iadon bynta eiei bad kano kano ka niam hynrei balei kim shah ia kiwei pat ki seng ban pynlong prokram. Ka ABVP ka dei beit thik tang ka seng ki samla pule. Lada ki don jingwit ia ki nonghikai Hindu bad ia ki khynnah pule Hindu namarba kane kam dei ka NGO University hynrei ka dei ka Central University bad lada ki pharep kumta ia ngi ki dei ban ujor da ka case,” la ong shuh shuh ka Kong Sumer.
