Shillong, Jymmang, 08: Ki Pulit jong ka Bomb Detection and Disposal Squad (BDDS) ha ka sngi Balang ki la kurup noh ia u bomb u bym pat bthei ha kawei ka jaka ha ka shnong Mawlynrei, Shillong.
La lap ia une u bomb uba jrong 3.5 inshi diameter katba ki misteri ki dang tih paia ia ka nongrim ha kane ka jaka.
Ka jaka ba la lap ia une u bomb ka dei ka jaka jong ki riewshimet bad ki Pulit ki la buh noh ia une u bomb ha ka jaka kaba shngain katba ka kynhun ki Pulit ka Bomb Detection and Disposal Squad ki dang pynlong ia ka jingbishar kaba bniah.
Ha u kyrwoh ba la phah da u Superintendent of Police ka East Khasi Hills u Rituraj Ravi u la iathuh ba ki Pulit ki la pynlong ia ka jingtohkit ha kaba iadei bad ka jingioh kurup ia une u bomb na kane ka jaka.
