Shillong, Nailur, 04: Shi kynhun ki snar khaii tuh na u pud u sam jong ka ri Bangladesh bad na ka ri India kiba donkti ban khaii tuh ïa ki masi na khappud ki la pyni bor ïa ki shipai BSF kiba ap pahara ha khappud ka East Khasi Hills District.
Ha ka jingujor sha ki Pulit, u Osman Ali, u Ophisar ki shipai BSF ka Border Outpost, Ryngku, East Khasi Hills District u la pyntip ba ha ka sngi baar mynta ka taiew ha ka por kumba 2.05 baje mynstep, ki shipai BSF kiba ïaid pahara ki la lap ïa ka kynhun jong ki briew bym lah ban ithuh durkhmat kiba don kumba 40/50 ngut na u pud u sam ka ri Bangladesh bad kumba 20/30 ngut na u pud u sam ka India kiba dang khaii tuh ïa ki masi ha khappud hajan ka wah Khasimara, East Khasi Hills.
Ki shipai BSF kiba la pynibor ki la shah kawang kylla da ki maw ha ki snar khaii tuh masi bad ban ïada ïalade ki shipai BSF ki la kawang sha ki snar khaii tuh uwei u bom sohmynken (Chilli Grenade) bad uwei u Stunt Grenade.
Hynrei watla katta, ki runar khlem jingsalia ki la bteng ban kawang beit da ki maw ïa ki shipai BSF bad da ka jingbym banse ki shipai BSF ki la hap ban siat pyntieng sha suiñ lai kuli na ka Pump Action Gun bad 15 kuli na ki Service Rifle jong ki.
Hadien, ki snar khaii tuh ki la phet krad shaphang u pud ka ri Bangladesh. Ha ka jingkhynra ki shipai BSF ki la ïoh kurup saw tylli ki masi bad kawei ka wait.
