Shillong, Rymphang 25: Ar tylli ki kali ba kynthup ïa ka Auto Truck bad kawei ka kali JCB ba pynieng ha phyllaw ïing ki la jan ingkhong hadien ba ki runar ki la kawang da u petrol bom hynrei donbok ba ki trai ing kiba la iohsngew ia ka jingbthei ki la pynlip noh ïa ka ding da kaba theh um ban lait na ka jingpluh jong kine ki ar tylli ki kali ba la pynieng ha phyllaw ing.
Kane la jia ha ka step sngi U Blei ha ka por kumba 1.20 mynstep ha kaba ki runar ki bym lah ban ithuh durkhmat ki la kawang da u petrol bom ha ka jaka ba la pynieng ïa ka kali Auto Truck bad ka kali JCB ha ka phyllaw ïing jong u Bah Lovercuf Nongshli ha ka shnong Umsning Patarim ba hap ha ka Umsning Police Outpost, Ri Bhoi District.
Ka Auto Truck kaba don ïa u number ML10 A – 4205 ka dei jong uwei u bar jylla ba la tip kyrteng kum u Horander Prasad, ha kaba u ju pyndonkam ban kit ïa ki mar.
Ki Pulit ka Ri Bhoi tang shu ïoh jingtip halor kane, ki leit mardor sha kane ka jaka ban pynlong ïa ka jingtohkit bad ha ka jingtohkit la lap ba ym don kano kano ka jingjia basngewwsih lait noh ka jingjulor ba malu mala jong ka kali Auto Truck.
Ki Pulit ki la pynlong ïa ka jingtohkit kaba bniah ban lap ksai ïa ki runar kiba donkti ha kane ka kam bymman bad u Superintendent of Police ka Ribhoi District u Jagpal Singh Dhanoa u ong ba ki runar kiba donkti ha kane ka kam bymman kin ym lait suk na ki kti jong ka aiñ.
