Shillong, Rymphang, 25: U Myntri Rangbah Duh, Narendra Modi u la sakhi ia u mawmer ha ka sngi u Blei da kaba aiti sha ka ri bad buh maw nongrim ia ki projek bapher bapher kiba kot T 48,100 klur ha Rajkot, Gujarat.
Kine ki projek ki dei ha ki kam ka koit ka khiah, ki surok, lynti rel, ka petroleum & natural gas, ki kam jngoh kai bad kiwei kiwei.
Lyngba kane ka sienjam, u Modi u la pyndonkam ia ki lad Digital ban plie bad pyllait paidbah ia ki ar tylli ki kali Mobile Food Testing Laboratory, (FSW) ha State Central Library, Shillong ha ka jingsakhi lang jong ka Myntri kaba khmih ia ka Tnat ka Koit ka Khiah Dr. Mazel Ampareen Lyngdoh ryngkat ka jingdonlang jong u Commissioner ka tnat Food Safety u Dr. Joram Beda bad ka Deputy Commissioner jong ka East Khasi Hills District ka Kong R.M Kurbah bad kiwei kiwei.
Kine ar tylli ki lad jong ka Food Safety Standards Authority of India (FSSAI) ban leh test ia ki marbam ki dei kiba la tip kum ka Food Safety on Wheel (FSW).
Kane ka dei ruh ka sienjam ban pynthikna ia ka jingshngaiñ ki mar bam ha baroh ki jaka. Ki FSW kiba la pynbiang lut ki jingai jingshakri bad kiba don ki nongtrei kiba la tbit ha ka kam, kin kyntiew ia ki lad leh test bad kin ai jinghikai ruh shaphang ia ki rukom kiba kyntiew ia ka jingshngain ha ki mar bam. Shuh shuh, kin pynsaphriang jingtip ha ki paidbah da kaba poi sha ki jaka ba kyndong tam jong ka jylla.
Ka jingwanrah ia kine ki ar 2 tylli ki FSW ha Meghalaya ka wan ruh ha ryngkat ka projek kaba kot sha ka T. 0.95 klur.
