Shillong, ïaïong, 26: Ki runar ki bym lah ban ithuh durkhmat ki la kawang da u petrol bomb ha ka ingsah jong u Symbud Myntri Rangbah ka Jylla uba peit ïa ka tnat Pynroi Sor Bah Sniawbhalang Dhar ha Nongmynsong ha ka miet sngi Palei.
Ha kaba ïadei bad kane, u Bah Dhar u la mudui da ka ejahar, la ong ki Pulit ha ka sngi Thohdieng.
Ka jingtohkit ka dang ïaid shakhmat ban ïohkem ïa ki runar kiba donkti ha kane ka jingkawang petrol bomb, la ïathuh ki Pulit.
U Superintendent of Police ka East Khasi Hills Rituraj Ravi ha ka jingïakren bad ki lad pathai khubor u la ïathuh ba dalade hi u la leit jurip ïa ka iing jong u Bah Dhar kaba la shah kawang petrol bomb bad ngi la pynlong ka jingtohkit.
U la ïathuh ba ki runar ki la kawang ïa u petrol bomb na shiliang surok bad leit dei ïa ka mala kaba hajrong jong ka ing.
Shuh shuh u la ïathuh ba ha kane ka jingjia kam shym la don kano kano ka jingjulor.
Hadien kane ka jingjia, ki Pulit ki la pynkhlaiñ ïa ka jingap pahara ha ka ïing jong u Myntri Rangbah ka Jylla u Conrad K. Sangma, u Symbud Myntri Rangbah ka tnat Kam Pohing u Bah Prestone Tynsong bad ha kiwei kiwei ki ophis ba kongsan jong ka Sorkar.
Ha ka 24 tarik mynta u bnai, ki runar ki la kawang da u petrol bomb ïa ka kali kaba synran ïa u Director (Personel) ka NEEPCO ha surok Demthring.
U SP haba pynshai halor kane, u la ïathuh ba ki runar ki la kawang da ka jaiñ jot ba la thang ym da u petrol bom ïa ka kali kaba synran ïa u Director (Personel) ka NEEPCO. U la pyntip ba ki Pulit ki la register case bad ka jingtohkit ka la ïaid shakhmat ban lap ïa kiba donkti.
U SP u la kyntu ïa ki paidbah nongshong shnong ka jylla ba kim dei ban shim ïa ka aiñ ha ki kti lajong hynrei ban ïatreilang bad ka tnat Pulit kaba dang pynlong ïa ka jingtohkit kaba dang ïaid shakhmat bad ban bud ruh ïa ki kyndon jong ka aiñ.
