Shillong, ïaïong, 26: Tang hapoh 24 kynta ba ki nongïalam jong ka Hynñiewtrep Youths Council (HYC) ki la leit jurip kyndit ïa ka Slum ba la sah be-aiñ da ki poiwir ha ka jaka jong ka Shillong Cantonment Board (SCB) kaba don ha lyndet jong ka Them Iewmawlong, ha ka sngi Thohdieng ka Meghalaya Energy Corporation Limited (MeECL) ka la phah ïa ki nongtrei ban ot noh ïa ka bording na ki ïing ba la shu ring tuh ha kane ka jaka.
Katba ki nongtrei jong ka MeECL ki dang jynrat lut ïa ki waïar elektrik na ki ing tap shiliang ha kane ka Slum, la synran lang da ki Pulit bad ki CRPF.
Ki don kumba 86 tylli ki ïing ba la shna beaiñ da ki poiwir kiba kam ba ki dei na ka jylla Assam bad don ruh kiba wan na ka jylla Uttar Pradesh. Ka jingring tuh ïa ka bording ka la jia mynta da ki phew snem namarba ym shym la don mano mano ruh ba ïohi ïa ka jingmih jong kane ka Slum hapdeng ka sor Shillong.
Tang hapoh khyndiat kynta ba la jynrat ïa ki waïar elektrik, nongtrei jong ka MeECL ki la lap ba dei ka dukan Ajmera Marbles kaba la ai tuh ïa ka bording sha ki ing jong ki poiwir. Tang shu lap, ki nongtrei ki la ot noh ïa ka laiñ ba la ai bording sha ki ing jong ki poiwir.
Ha ka jingïakren bad ki lad pathai khubor u President ka HYC Bah Roy Kupar Synrem u la ong ba ka MeECL ka dei ban thung da ka jingtohkit kaba bniah ban lap ïa kiba donkti ban ai tuh ïa ka bording sha ki iing tap shiliang jong ki poiwir la ka long ïa ki longing kiba ai tuh ïa ka bording ne ïa u Lineman ne u Meter Reader.
“Lada lap ba ki don bynta lang ban ai tuh ïa ka bording ka MeECL ka dei ban shimkam halor ki briew kiba donkti,” u la ong.
“Ngi ai khublei ïa ka jingshimkhia jong ki ophisar ka MeECL tang shu mih ka khubor halor ka jingjurip jong ngi hynnin ka sngi mynta ka step ki la wan ot ïa ka bording jong kine ing ba la ring tuh. Ngi sngewsih ban ong ba ki bor sorkar ki kyndit bynriew tad ynda ba ma ngi kum ka seng ngi pyni ïa ki jingduna jong ki hynrei ha ka jingshisha kam dei shuh ka kamram jong ngi ban dang kyntu ïa ki ban leh la ka jong ka kamram,” u la ong.
U la kyntu ïa ka MeECL ba nangne shakhmat ba kumno kim lah ban ïohi da ki spah tylli ki iing ki tuh ïa ka bording. “Katkum ka jingïohi jong ngi, ngi lap ba kine ki briew ki ring ïa ka bording na ki Meter. U Meter Reader uba ka MeECL ka phah ban shim jingkheiñ ïa ka bai thang bording hato u leh aiu,” la buh jingkylli u President ka HYC.
“Ngi la ïoh ban ïakren bad u SDO (Revenue) uba peit ïa kane ka jaka jong ka MeECL ha kaba ngi la buh jingkylli balei u Meter Reader um lah ban peit ïa ka jingring tuh ïa ka bording ne ki ai laiñ tuh sha kane ka jaka. Ngi la kyntu ïa u SDO (Revenue) ba u dei ban shim kam ïa u Meter Reader namarba ngim tip ïoh ba u Meter Reader ne Lineman ka MeECL ki don bynta lang ha kaba ai bording ne ki don jingïohnong eiei lyngba ka jingai bording sha ki spah tylli ki longïing hangne,” la ong u Bah Synrem.
U la ïathuh ba tang shu ïoh jingtip ha ka por mynstep ba ki briew jong ka MeECL ki don ha kane ka jaka ki la leit marmar.
“Ynda ngi la wan ha kane ka jaka, ngi la ïakren bad ki ophisar jong ka MeECL ba dei peit ïa ka Vigilance Cell ngi lap ba kine ki briew ki la don naduh ka por mynstep ban ot ïa ki waïar kiba tan bording sha kane ka jaka. Kane ka pyni shai ba ka don ka jingïatreilang ne ka jingïasuhbuit hapdeng ki briew kiba tip bha ïa kane ka kam. Ka MeECL ka dei ban thung ïa ka jingtohkit ban tip lada don shisha ki briew kiba ïadon bynta ha ka jingring tuh ïa ka bording dei ban pynshitom ïa ki katkum ka aiñ.
Hadien kane, ki nongïalam jong ka HYC ki la leit ban ïakynduh sa ïa u Chief Executive Officer jong ka Shillong Cantonment Board (SCB) ha kaba u la pyntip ba hapoh ka Cantonment Board ki don ar tylli ki bor kiba peit ïa ki lyngkhot jaka ba kynthu ïa ki jaka jong ki shipai bad ka Defence Estate Officer kaba don ïa ka ophis ha Guwahati, Assam.
“Ka Defence Estate Officer ka dang don hapdeng ka jingïakhun mukotduma ban beh ïa ki briew kiba sah be-aiñ ha u pud u sam jong ka Cantonment,” u la ong.
