Nongpoh, Jymmang, 11: Kawei ka kali kamai Local Taxi kaba don ia u nombar ML05-D-4866 ka la kem ding kynsan hapdeng surokbah National Highway-44 katba ka dang wanphai na ka jingleit buh ia ki nongleit jingleit sha Umroi Nongrah, Ribhoi District.
Kane ka la jia ha ka por kumba 12:00 baje shiteng sngi jong ka Sngi Saitjaiñ ha kaba u nongñiah jong ka kali u la lait na ka jingjia ba sngewsih hynrei lait noh tang ka jingduhnong jong u trai ka kali kaba la kem ding bad ingkhong hapdeng surok.
Katkum ka khubor ba la iohlum la iathuh ba hadien ba la wan phai na ka jingleit buh ia ki nongleit jingleit sha Retreat Centre ha Umroi Nongrah, u nongñiah jong ka kali u Bah Tyngshaiñ, 26 snem ka rta uba sah ha ka shnong Mawblang Ribhoi District u la pynlip noh ia ka Engine bad shwa ban poi ha surokbah National Highway-44 katba u dang pyrshang ban khyrwait ia u shabi ban pynim biang ia ka Engine hynrei kynsan kynsan ka kali ka la kem ding.
Da ka jingwan poi jong ki Pulit ka Fire and Emergency Services la lah ban pynlip noh ia ka jingklang jong ka ding. Ki Pulit ki la tan noh ia kane ka kali sha Umroi PIC na ka bynta ban leh katkum ki kyndon jong ka aiñ.
