Shillong, Jymmang 17: Ki dkhot jong ka Hynñiewtrep Integrated Territorial Organization (HITO) South West Khasi Hills District kiba la hiar khynra ha ïew Mawkyrwat ki la ïoh bat 18 ngut ki briew kiba la im kyrni ban dih drok bad kumjuh arngut ki snar nongkhaïi drok.
Hadien ba la ïoh kurup ïa u drok, ïa ka pisa, kynthup ruh ïa ki thyrnia injek bad ïa u Ganja, ka seng ka la thang da ka ding.
Ha ka jingïakren bad ki lad pathai khubor u President ka seng Bah Polius Thyrniang u la ong ba ha kane ka jingkhynra kaba ar sien ka seng ka la ïoh bat haduh 18 ngut ki briew kiba ju kyrni ban dih ïa u drok kynthup ruh ïa ki nongkhaïi.
U la ïathuh ruh ba kine ki briew kiba ju mlien ban dih drok ki la thaw da ka kynhun ïa kaba ym lah ban tip la ki thmu sha kaba bha ne sha kaba sniew hynrei kum ka seng hi kan ym tieng bad rat dyngkhong syndon kum kine ki jingdih kiba long ka daw jong ka jingjot ki longïing longsem, ka shnong ka thaw bad ka imlang ka sahlang.
ïa ki 18 ngut kiba la shah bat, ka HITO ka la aiti ha ka Dorbar Shnong Mawkyrwat ryngkat ka jingdonlang jong ki nongïalam ka Seng Samla Shnong Mawkyrwat bad ki Village Defence Party (VDP).
“Ïa ki tiar ki tar ba la ïoh kurup na ki briew ba la ïoh bat la rai paidbah ban shu thang beit ha ka ding,” ong u President.
“Ka rai jong ngi kum ka seng kam dei ka jingkut, hynrei nangne shakhmat ngin dang pynjur shuh shuh ki jingkhynra khnang ban rat dyngkhong syndon ïa u drok na ka South West Khasi Hills District baroh kawei,” ong u Bah Thyrniang.
