Jowai, Jymmang, 17: Ka Kashari jong u Sessions Judge ka West Jaiñtia Hills District ka la rai pynrem ïa u Kyrshanlang Sungoh na ka shnong Mookhap hadien ba la lap ïa ki sakhi sabut ba u donkti ban batbor kynthei.
Kane ka la jia naduh u snem 2010 bad ki Pulit ki la register case hapoh ka Jowai Police Station hapoh ka Section 376 Indian Penal Code (IPC) bad ïa ka case la bynshet ha Women Police Sub Inspector ka Kong O. Tyngkan ban pynlong ïa ka jingtohkit.
Hadien ka jingbishar ba khatduh ïa kane ka mukotduma, ka Kashari ka la rai pynrem ïa u Kyrshanlang hadien ba la lap ïa ki sabut kiba biang bad hukum ruh ban set along haduh hynñiew snem ryngkat ka jingdaiñ kuna kaba T. 5000 hajar bad lada um lah ban siew ïa ka kuna yn sa pynjlan ïa ka jingset along sa shibnai.
Ha kajuh ka por ka Kashari ka la hukum ïa u Kyrshanlang Sungoh ban siew ïa ka bai mynraiñ khmat kaba T.5 lak sha ka lanot kaba la shah leh be-ijot.
