Shillong, Lber, 14:Hynniew ngut ki mynder Bangladeshi ki la shah kem ha ki shipai BSF katba ki dang thmu ban wan rung tuh shapoh u pud u sam jong ka ri India lyngba ka khappud jong ka East Khasi Hills, ka East Jaiñtia Hills bad ka South Garo Hills District ka jylla Meghalaya.
Lyngba ka jingïoh jingtipna ki tnat syntiat, ki shipai BSF jong ka 172 Battalion ki la pynlong ka jingpynap shrip ha khappud jong ka East Jaiñtia Hills ha kaba ki la ïoh kem ïa ki saw ngut ki mynder Bangladeshi.
Ha ka jingpynap shrip da ki shipai BSF jong ka 22 Battalion, ki la ïoh kem ïa lai ngut ki mynder Bangladeshi ha khappud ka South Garo Hills katba ki dang wan rung beaiñ sha poh u pud u sam jong ka ri India da ka jingthmu ban wadkam bylla.
Ha kawei pat ka liang, ki shipai BSF jong ka 4th Battalion ki la ïoh kem ar ngut ki nong India ryngkat bad ka kali kaba kit ïa ka shini hajan khappud jong ka Nayabazar, Pynursla kaba hap hapoh ka East Khasi Hills district. Katkum u kyrwoh ba la phah da ka tnat shipai BSF la ong ba kine ki arngut ki nong India ki dei kiba dang thmu ban shalan tuh ïa ka shini sha ka ri Bangladesh.
Ïa ka kali, ïa ka shini bad ïa kine ki arngut ki nong India la aiti noh sha ki bor ba dei peit ban leh ïa kaba donkam katkum ka aiñ.
